Prezıdent Ulttyq qordy basqarý isin jetildirý týraly usynys engizýdi tapsyrdy

ASTANA. QazAqparat – Aldaǵy 7 jylda Ulttyq qordyń aktıvteri 100 mıllıard dollarǵa jetýge tıis. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Kelesi másele – bıýdjet saıasaty. Úkimet bıýdjettiń turaqty bolýyn qamtamasyz etýi kerek. Ulttyq qordyń transfertine táýeldilikten birtindep qutylýymyz qajet. Bir jyldan keıin Ulttyq qordyń ınvestıtsııalyq tabysynyń jartysyn balalardyń esepshotyna aýdara bastaımyz. Sol kezde barsha azamattar Ulttyq qordaǵy ahýaldy jiti qadaǵalap otyratyn bolady. «Árbir azamat – ulttyq baılyqtyń ıesi» degen sóz jaı uran emes. Bul naǵyz halyqtyq, qoǵamdyq baqylaýdyń bastalǵanyn bildiredi. Úkimet te, Ulttyq bank te muny jete túsinýi kerek. Taǵy da esterińizge salamyn, aldaǵy 7 jylda Ulttyq qordyń aktıvteri 100 mıllıard dollarǵa jetýge tıis», - dedi QR Prezıdenti.

Sondyqtan Memleket basshysy aqshany azyraq jumsap, kóbirek tabys tabý kerektigin basa aıtty.

«Qazir bul máselede olqylyqtar bar. Ulttyq qordyń ınvestıtsııalyq kirisi ózge elderdiń mundaı qorlarymen salystyrǵanda áldeqaıda tómen. Ulttyq qordyń jyldyq tabysy sońǵy 10 jylda 1,6 paıyz boldy. Sıngapýrdaǵy osyndaı qor 6,4 al Norvegııanyń qory 7,5 paıyz tabys tapqan. Demek, bizdegi qordy basqarý mindetin atqaratyn organnyń jumysy aıtarlyqtaı tıimdi dep aıtýǵa bolmaıdy. Ulttyq bankke Úkimetpen birlesip, Ulttyq qordy basqarý isin jetildirý týraly usynys engizýdi tapsyramyn. Onda men aıtyp ótken kemshilikter túgel eskerilýge tıis», - dedi Qasym-Jomart Toqaev.