Prezıdent «Ulttyq tsıfrlyq mura» qoryn qurý ıdeıasyn qoldady

QYZYLORDA. KAZINFORM – Tsıfrlandyrý jáne jasandy ıntellekt jyly aıasyndaǵy mundaı bastama tarıhı muramyzdy saqtap, ony tereń zerdeleýge jol ashady. Bul týraly Memleket basshysy Qasym-Jomart Toqaev Qyzylorda qalasynda ótip jatqan Ulttyq quryltaıdyń V otyrysynda aıtty.

- Tsıfrlyq tehnologııalar men jasandy ıntellekt qarqyndy damyǵan saıyn ulttyq biregeıligimizdi nyǵaıtý ózekti bola túsedi. Tól tarıhy men mádenıetin elektrondy formatqa kóshirip, ony jahandyq tsıfrlyq órkenıetke qosqan elder ǵana ulttyq bolmysyn saqtap qalady. Muny jańa dáýirdiń talaby deýge bolady. Túptep kelgende, bul – jurtymyzdyń ıdeologııalyq derbestigine jáne bolashaǵyna tikeleı qatysty másele. Men halyqtyń jady men ǵylym-bilimin jınaqtaıtyn «Ulttyq tsıfrlyq mura» qoryn qurý ıdeıasyn qoldaımyn. Tsıfrlandyrý jáne jasandy ıntellekt jyly aıasyndaǵy mundaı bastama tarıhı muramyzdy saqtap, ony tereń zerdeleýge jol ashady, - dedi Qasym-Jomart Toqaev.

Osy oraıda Prezıdent byltyrǵy Quryltaıda ǵylymı eńbekterdi, muraǵat materıaldaryn, murajaı qorlaryn jáne óner týyndylaryn júıeleý qajettigin erekshe atap ótkenin eske saldy.

- «Ulttyq tsıfrlyq mura» bul sharýany zaman talabyna saı júrgizýge múmkindik beredi, - dedi Memleketr basshysy.