Prezıdent Ulttyq mýzeıdegi óner týyndylary kórmesin tamashalady
ASTANA. KAZINFORM – Memleket basshysy Qasym-Jomart Toqaev elordadaǵy Ulttyq mýzeıge arnaıy baryp, otandyq jáne álemdik beıneleý óneri týyndylarynyń kórmesimen tanysty. Bul týraly Aqordanyń baspasóz qyzmeti habarlady.
Prezıdentke ónertanýshy Olga Batýrına qazaqstandyq talantty qylqalam sheberleriniń týyndylary jınaqtalǵan «Dala keskindemesi: rámizder, boıaýlar, beıneler» atty kórmeni tanystyrdy. Qasym-Jomart Toqaevqa áıgili ıtalııalyq sýretshi Leonardo da Vınchıdiń «Ádemi hanshaıym» (La bella principessa) kartınasynyń túpnusqasy kórsetildi.
Tanymal týyndynyń kórmesi Ulttyq mýzeıdiń 10 jyldyǵyna oraı Italııanyń «Scripta Maneant» baspasymen birlese uıymdastyrylǵan. Joǵary Renessans dáýirine jatatyn bul qundy jádiger Eýropadan tysqary jerge alǵash ret shyǵarylyp otyr. Kórme elimizdiń Mádenıet jáne aqparat mınıstrliginiń, Italııanyń Qazaqstandaǵy elshiliginiń jáne Italııa mádenıet ınstıtýtynyń qoldaýymen ótip jatyr. Elorda turǵyndary men qonaqtary Leonardo da Vınchıdiń osynaý biregeı týyndysyn 4 tamyzǵa deıin tamashalaı alady.
