Depýtat Kentaý turǵyndaryna jyl saıyn 6 mlrd teńge ústemeaqy tóleýdi usyndy
ASTANA. KAZINFORM – Senat depýtaty Murat Qadyrbek ekologııasy qaýipti aımaqtarda turatyn adamdarǵa ústemeaqy tóleýdi usyndy.
Depýtattyń málimeti boıynsha, turǵyndar 2016 jyldan beri Kentaý men onyń aınalasyndaǵy eldi mekenderdi ekologııalyq apat aımaǵy dep jarııalaý kerektigin aıtyp júr.
Osy máseleni zertteý úshin qazir arnaıy komıssııa jumys istep jatyr.
«Eńbek jáne halyqty áleýmettik qorǵaý mınıstrligi Túrkistan oblysynyń Kentaý qalasy men oǵan irgeles eldi mekenderdiń aýmaǵyn ekologııalyq daǵdarys jaǵdaıyna jaqyndaǵan aımaqqa kirgizý boıynsha zańnamalyq tıisti ózgerister engizý úshin naqty sharalar qabyldaýy qajet. Sonymen qatar, atalǵan aýmaqta jergilikti bıýdjetten qarjylandyrylatyn bıýdjettik mekemelerde jumys isteıtin qyzmetkerlerge ekologııalyq aımaqta turǵany úshin respýblıkalyq áleýmettik aýdarymdarmen qosa 20% ústemaqy, jalpy kólemi jyl saıyn 6 mlrd teńgege jýyq qarjy qarastyrý qajettigin sheshýge yqpal etýińizdi suraımyz», - dedi senator.
