Prezıdent Ulttyq qordyń eń basty mıssııasyn atady
ASTANA. KAZINFORM — Ulttyq qordyń eń basty maqsaty, mıssııasy — el baılyǵyn uqypty ustaý jáne odan ári arttyrý, sondaı-aq, ony qazirgi jáne keleshek urpaqtyń ıgiligine jaratý. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.
Prezıdenttiń aıtýynsha, Ulttyq qor kóptegen jyl boıy osy negizgi mindetti laıyqty oryndap keledi, ıaǵnı qarjylyq turaqtylyqty qamtamasyz etýge zor úles qosyp otyr.
— Jas urpaqtyń ıgiligin oılasaq, bul baǵytta qazirden bastap naqty ári batyl qadamdar jasaýymyz kerek. Ózekti máselelerdi keıinge qaldyrýǵa bolmaıdy. Ár másele óz sheshimin tabýǵa tıis. Basty talap — osy, — dedi Memleket basshysy.
Ol keıingi býynǵa órkenıetti, ozyq, jańarǵan memleketti amanat etý keregin aıtty.
— Keler urpaq aldyndaǵy tarıhı jaýapkershiligimiz olardyń esepshotynda qarjy qaldyrýmen ǵana shektelmeıtinine senemin. Biz urpaǵymyzǵa tehnologııasy damyǵan, ekonomıkasy qýatty ári básekege qabiletti, ınfraqurylymy zamanaýı, ómir súrý sapasy joǵary, ár azamattyń ózin tanytyp, áleýetin júzege asyrýyna múmkindik beretin jańa deńgeıdegi el qaldyrýymyz kerek. Bul — bizdiń basty mindetimiz, tipti tarıhı aýqymdaǵy mıssııamyz desek te bolady, — dedi Qasym-Jomart Toqaev.
Bul — adam kapıtalyn damytýǵa, azamattardyń turmys sapasyn jaqsartýǵa, ıaǵnı el bolashaǵyna salynatyn uzaq merzimge arnalǵan ınvestıtsııa ekeni de aıtyldy.
Aıta keteıik, bıylǵy Joldaý «Jańa tarıhı kezeńdegi Qazaqstannyń ózekti mindetteri» dep atalady.
