Prezıdent Ulttyq qordy basqarý jónindegi keńestiń fýnktsııalaryn keńeıtti

ASTANA. KAZINFORM — Memleket basshysy Qasym-Jomart Toqaev «Qazaqstan Respýblıkasynyń Ulttyq qoryn basqarý jónindegi keńes týraly keıbir máseleler» týraly Jarlyqqa qol qoıdy.

Qujat jańa Bıýdjet kodeksiniń kúshine enýine baılanysty qabyldanyp, Prezıdent janyndaǵy Ulttyq qordy basqarý jónindegi keńestiń rólin kúsheıtýge baǵyttalǵan.

Keńes — Prezıdent janyndaǵy konsýltatıvtik-keńesshi organ jáne Ulttyq qor qarajatyn paıdalaný men Biryńǵaı jınaqtaýshy zeınetaqy qorynyń (BJZQ) zeınetaqy aktıvterin basqarý máseleleri boıynsha usynystar ázirleýmen aınalysady.

Jarlyqqa sáıkes, keńes kelesi fýnktsııalardy júzege asyrady:

— Qor qarajatyn qalyptastyrý men paıdalanýdyń tıimdiligin arttyrý jóninde usynystar ázirleý;

— Respýblıkalyq bıýdjetke Ulttyq qordan kepildendirilgen transfert mólsheri boıynsha usynystar ázirleý;

— Basqa qarjylandyrý kózderi bolmaǵan jaǵdaıda, búkil el úshin mańyzy bar asa mańyzdy nysandar men jobalardy qarjylandyrýǵa qordan nysanaly transfertter kólemin jáne baǵyttaryn qarastyrý;

— Ulttyq ál-aýqat qorynyń boryshtyq baǵaly qaǵazdaryn satyp alý arqyly qor qarajaty esebinen jobalardy qarjylandyrý jóninde usynystar qalyptastyrý;

— Qor qarajatyn ornalastyrýǵa ruqsat etilgen qarjy quraldarynyń tizbesin aıqyndaý;

— BJZQ-nyń zeınetaqy aktıvterin tıimdi basqarý boıynsha usynystar ázirleý;

— Zeınetaqy aktıvterin ınvestıtsııalaý baǵyttaryn, sondaı-aq satyp alýǵa ruqsat etilgen qarjy quraldarynyń tizbesin qarastyrý;

— BJZQ qyzmeti týraly jyl saıynǵy esepti taldaý jáne talqylaý.

Keńestiń jumysyn Qazaqstan Respýblıkasynyń Prezıdenti basqarady. Tóraǵa otyrystardyń ótkizilý orny men ýaqytyn belgileıdi, olardy ótkizýdi basqarady jáne keńes múshelerine mindetti tapsyrmalar beredi.

Keńes músheleri otyrys kún tártibin daıyndaýǵa jáne talqylaýǵa qatysady, usynystar engizedi jáne sheshim qabyldaýǵa qatysady.

Otyrystar jylyna keminde bir ret ishteı jáne syrttaı formatta ótkiziledi. Sheshimder qatysýshylar sanynyń jaı kópshilik daýsymen qabyldanady. Daýystar teń bolǵan jaǵdaıda tóraǵanyń daýsy sheshedi.

Keńestiń jumys organy retinde Qazaqstan Respýblıkasy Prezıdentiniń Ákimshiligi aıqyndaldy. Keńes quramynda ózgeris joq.

Keńes quramyna kimder kiredi:

— Qazaqstan Respýblıkasynyń Prezıdenti (Keńes tóraǵasy);

— Qazaqstan Respýblıkasynyń Premer-mınıstri;

— Qazaqstan Respýblıkasy Parlamenti Senatynyń tóraǵasy (kelisim boıynsha);

— Qazaqstan Respýblıkasy Parlamenti Májilisiniń tóraǵasy (kelisim boıynsha);

— Prezıdent Ákimshiliginiń basshysy;

— Ulttyq bank tóraǵasy;

— Premer-mınıstrdiń birinshi orynbasary;

— Joǵary aýdıtorlyq palata tóraǵasy;

— Qarjy mınıstri;

— Ulttyq ekonomıka mınıstri.

Jarlyq 2025 jylǵy 4 shildede kúshine endi.

Buǵan deıin Prezıdent bastamalaryna arnalǵan rezervti bólý qaǵıdalary jańartylǵany týraly jazǵan edik.