Prezıdent ulttyq qaýipsizdik organdary qyzmetiniń baǵyttary boıynsha birqatar tapsyrma berdi
ASTANA. KAZINFORM – Memleket basshysy Ulttyq qaýipsizdik komıtetiniń tóraǵasy Ermek Saǵymbaevty qabyldady. Bul týraly Aqordanyń baspasóz qyzmeti habarlady.
Prezıdentke vedomstvonyń jyl basynan beri atqarǵan jumysynyń nátıjesi men aldaǵy kezeńge arnalǵan mindetteri jóninde esep berildi.
Memleket qaýipsizdigi
43 adam lańkestik pen dinı ekstremızm baby boıynsha sottalǵan jáne 34 azamat tergelip jatyr, terrorızm men ekstremızmge qatysy bar 212 sheteldiktiń Qazaqstanǵa kirýine jol berilmedi, radıkaldy uıymdarǵa múshe 1498 sheteldik adamnyń elimizge kelýine shekteý qoıyldy. Terrorıstik jáne ekstremıstik qylmystar jasaǵany úshin izdeýde júrgen 12 sheteldik azamat ustaldy.
Qylmysqa qarsy kúres
13 qylmystyq toptyń qyzmeti toqtatylyp, olardyń 142 múshesi ustalǵan jáne 40 azamat tutqyndalǵan, zańsyz aınalymda júrgen 282 atys qarýy, 48 granata men 4586 oq-dári tárkilengen. Esirtki óndiretin 12 zerthana, sondaı-aq 13 halyqaralyq jáne 12 óńirlik tasymal arnasy joıylǵan. Zańsyz aınalymnan 3,2 tonna esirtki men psıhotropty zattar, 7,5 tonna prekýrsorlar alyndy.
Sybaılas jemqorlyq
Jemqorlyq pen quqyqqa qaıshy basqa da áreket jasaǵan memlekettik jáne quqyq qorǵaý organdarynda jumys isteıtin 15 laýazymdy tulǵa ustaldy, 1,6 trıllıonnan asa teńge kóleminde memleketke keltiriletin zalalǵa tosqaýyl qoıylyp, onyń 220 mıllıard teńgesi qazynaǵa qaıtaryldy.
Shekara jáne kıberqaýipsizdik
Shekarany buzǵan 16 myńnan astam adam ustalyp, 3025 tulǵa elden shyǵaryldy, qarý-jaraq pen oq-dári, esirtki jáne basqa da tyıym salynǵan zattardy alyp ótpek bolǵan 600-den asa fakti áshkerelendi, shekara arqyly 11 mıllıard teńge men quny 16,6 mıllıard teńge bolatyn taýarlardy zańsyz alyp ótýge jol berilmedi,
memlekettik organdardyń aqparattyq júıesine jasalǵan 796 mıllıon kıbershabýyl áshkerelengen.
Prezıdent ulttyq qaýipsizdik organdary qyzmetiniń baǵyttary boıynsha birqatar tapsyrma berdi.
Aıta ketelik búgin Memleket basshysy Bala quqyqtary jónindegi ýákil Dınara Zákıevany qabyldaǵan edi.