Prezıdent medıtsına tarıhynda tuńǵysh ret jasalǵan ota úshin hırýrgterge alǵys aıtty

ASTANA. KAZINFORM – Memleket basshysy Qasym-Jomart Toqaev A.N. Syzǵanov atyndaǵy Ulttyq ǵylymı hırýrgııa ortalyǵyna quttyqtaý joldady. Bul týraly Aqorda málim etti.

Jýyrda A.N. Syzǵanov atyndaǵy Ulttyq ǵylymı hırýrgııa ortalyǵy elimizdiń medıtsına tarıhynda tuńǵysh ret bir mezette úsh naýqasqa úsh donordyń búıregin toǵyspaly transplantatsııa tásilimen salatyn asa kúrdeli operatsııany sátti ótkizdi. Prezıdent belgili hırýrg, professor Bolatbek Baımahanovtyń jetekshiligimen jasalǵan bul operatsııany otandyq medıtsınanyń zor jetistigi retinde baǵalap, ortalyq ujymyna Alǵys hat joldady. 

– Memleket densaýlyq saqtaý salasyn damytýǵa basa mán beredi. Bul rette kóptegen irgeli bastama qolǵa alynyp, aýqymdy jumys atqarylyp jatyr. Sonyń nátıjesinde ulttyq medıtsına qarqyndy damyp keledi. Sizder jasaǵan biregeı operatsııa – sonyń aıqyn dáleli. Qazir elimiz óte kúrdeli transplantatsııalyq operatsııa jasaıtyn álemdegi alty memlekettiń qataryna kiredi. Bul jetistikke otandyq mamandardyń, sonyń ishinde ózderińizdiń qajyrly eńbekterińiz ben erekshe bilimderińizdiń, sondaı-aq teńdessiz tájirıbelerińizdiń arqasynda jetip otyrmyz. Barshańyzǵa shynaıy rızashylyǵymdy bildiremin. Bolashaqta da ult saýlyǵyn jaqsartý úshin tynymsyz ter tógip, halqymyzǵa qaltqysyz qyzmet ete beresizder dep senemin, – delingen Alǵys hatta.

Eske sala keteıik, buǵan deıin otandyq medıtsına tarıhynda tuńǵysh A. N. Syzǵanov atyndaǵy ulttyq ǵylymı hırýrgııa ortalyǵy bazasynda professor Bolatbek Baımahanovtyń jetekshiligimen transplantolog dárigerler komandasy búırekti úshtik aıqas transplantatsııa jasaǵanyn jazǵan bolatynbyz.

Aqparatta aıtylǵandaı, Qazaqstan búırek transplantatsııasy boıynsha joǵary tehnologııalyq aralasý júrgizilip jatqan álemniń alty eliniń qataryna kirgen edi.