Prezıdent qazaqstandyqtardy Ulttyq dombyra kúnimen quttyqtady
ASTANA. KAZINFORM — Prezıdent Qasym-Jomart Toqaev qazaqstandyqtardy Ulttyq Dombyra kúnimen quttyqtady. Bul týraly Aqorda málim etti.
Qurmetti otandastar!
Barshańyzdy mereıli mereke – Ulttyq Dombyra kúnimen shyn júrekten quttyqtaımyn! Qos ishekti qasterli aspap – ulttyq biregeıligimizdiń ajyramas bóligi, halqymyzdyń rýhyn kóteretin baǵa jetpes mura.
Dombyra arqyly tereńnen tamyr tartqan tól qundylyqtarymyz jurt jadynda jańǵyryp, tórge ozady. Osylaısha, dáýirler men urpaqtar arasyndaǵy sabaqtastyq saqtalyp keledi.
Shyn máninde, ulttyń úni sanalatyn qasıetti aspabymyz qýanyshty sátterde de, qıyn kezderde de berekeli birligimizdi nyǵaıtyp, eldiń rýhyn asqaqtatýǵa sebepker boldy. Dombyranyń kúmbiri azamattarymyzdy jigerlendiredi, alǵa nyq qadam jasaýdy kózdegen rýhanı baǵyt-baǵdarymyzben úndesedi.
Jahandyq syn-qaterler kúsheıip, dástúrli qundylyqtar kómeskilengen qazirgideı almaǵaıyp zamanda Uly dalanyń mol murasy, ásirese, qara Dombyramyz tól mádenıetimizdiń myzǵymas tuǵyry bolyp qala beredi.
Halyqaralyq qaýymdastyqqa qazaq Dombyrasynyń sazdy áýenin tanystyrý – bizdiń jalpyulttyq paryzymyz. Asa kórnekti aqyn Qadyr Myrza Áliniń «Naǵyz qazaq – Dombyra» degen tamasha teńeýi Dombyrany keńinen dáripteý isinde temirqazyq ispettes bolýǵa tıis dep oılaımyn.
1 shildede, ıaǵnı Dombyra kúni qarsańynda memlekettilik jylnamasynyń jańa paraǵyn ashqan Halyq Konstıtýtsııasy zańdy kúshine endi. Munyń sımvoldyq máni aıryqsha.
Tarıhı-mádenı murany saqtaý, tól mádenıetti qoldaý alǵash ret shyn máninde Halyq Ata zańynyń negizgi qaǵıdaty retinde aıqyndaldy. Bul ósip-órkendeýge bet alǵan halqymyzdyń bitim-bolmysyna, maqsat-múddesine tolyq saı keletini sózsiz.
Dombyrashylarǵa, oqytýshylarǵa jáne ulttyq ónerimizdi Qazaqstanda, shet elderde joǵary deńgeıde nasıhattaýǵa ónegeli isimen, salmaqty sózimen atsalysyp júrgen barsha adamǵa shynaıy rızashylyǵymdy bildiremin.
Qazaqtyń án-kúıi aldaǵy ýaqytta da azamattarymyzǵa shabyt berip, Ádiletti ári Qýatty Qazaqstandy qurý jolynda jańa jetistikterge jeteleı beredi!
Ár shańyraqqa amandyq pen baq-bereke tileımin!
Aıta keteıik, Ulttyq dombyra kúnine oraı Qazaqstanda 2000-nan astam mádenı is-shara ótedi.
