Prezıdent Ulttyq banktiń saıasaty týraly: Burynǵy ustanymdar jumys istemeı jatyr

ASTANA. KAZINFORM – Prezıdent Qasym-Jomart Toqaev Úkimettiń keńeıtilgen otyrysynda Ulttyq banktiń jumysyna baǵa berdi.

- Ulttyq bank jumysyn mandatyna saı júrgizip otyr, bul túsinikti. Jumys aǵymdyq rejımde júrip jatyr. Árıne, máseleler bar. Birinshi kezekte adamdardy ulttyq valıýta baǵamynyń qubylmalylyǵy alańdatady. Sarapshylar Amerıka dollarynyń nyǵaıýyna baılanysty teńge baǵamyna qysym bolady dep kútip otyr. Valıýta baǵamynyń turaqtylyǵyn qamtamasyz etý, jalpy ınflıatsııany aýyzdyqtaý – asa mańyzdy jumys. Tipti qazir negizgi jumys dep aıtýǵa da bolatyn shyǵar, - dedi Qasym-Jomart Toqaev.

Prezıdent Ulttyq bankke bul baǵytta Úkimetpen tyǵyz áriptestikte jumys júrgizýdi tapsyrdy.

- Biz erkin naryqtamyz, óz betimizben júremiz degen ustanym qazir jumys istemeıdi. Óıtkeni ahýaldyń ózin qalypty dep aıtýǵa kelmeıdi. Bul týraly keıinirek aıtamyn, - dedi Memleket basshysy.

Aıta keteıik elordada Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.