Prezıdent aqsha-kredıt saıasatynyń negizgi baǵyttaryn aıqyndady
ASTANA. KAZINFORM - Prezıdent Ulttyq bank tóraǵasy Tımýr Súleımenovti qabyldady, dep habarlaıdy Aqordanyń baspasóz qyzmeti.
Memleket basshysy 2026 jylǵy qańtar-shilde aılaryndaǵy aqsha-kredıt saıasatyn júzege asyrý qorytyndysy týraly esepti tyńdady.
Qasym-Jomart Toqaevqa ekonomıkadaǵy jaǵdaı, iskerlik belsendilik, ınflıatsııaǵa áser etetin faktorlar jáne baǵany turaqtandyrý maqsatynda qabyldanyp jatqan sharalar jóninde baıandaldy.
Jyldyq ınflıatsııa on aı qatarynan tómendep, shildede 10,2 paıyzdy qurady. Buǵan júrgizilip otyrǵan aqsha-kredıt saıasaty, teńge baǵamynyń nyǵaıýy, tutyný belsendiliginiń turaqtalýy, sondaı-aq Úkimet pen Ulttyq banktiń ınflıatsııaǵa qarsy birlese qabyldaǵan jan-jaqty sharalary yqpal etip otyr.
Ulttyq bank tóraǵasy Prezıdentke ekonomıkany nesıeleý dınamıkasy týraly málimdedi. 2026 jyldyń 1 shildesindegi jaǵdaı boıynsha bankterdiń bızneske bergen kredıtteriniń nesıe portfeli jyldyq mánde 17,1 paıyzǵa ulǵaıǵan. Bul rette shaǵyn jáne orta bıznesti kredıtteý qarqyny 29,6 paıyzǵa deıin jedeldegen. Al tutynýshylyq kredıttiń ósýi jyl basyndaǵy 21,0 paıyzdan 13,0 paıyzǵa deıin baıaýlaǵan. Bul qabyldanǵan prýdentsııalyq sharalardyń tıimdiligin jáne tutynýshylardy kredıtteý qarqyny qalypqa kelgenin kórsetedi. Osylaısha, kredıt resýrstary bıznesti qarjylandyrýǵa kóbirek baǵyttala bastady.
Qasym-Jomart Toqaev valıýta naryǵyndaǵy jaǵdaıdan, Ulttyq qor men BJZQ aktıvteriniń, sondaı-aq eldiń altyn-valıýta rezervteriniń jaı-kúıinen habardar boldy. Bıyl 1 shildedegi kórsetkish boıynsha Ulttyq qor men altyn-valıýta rezervteriniń jıyntyq kólemi 127,3 mıllıard dollardy qurady. Alatau City qarjy ekojúıesin damytý maqsatynda Ulttyq bank kapıtaldyń jyldam ári ıkemdi qozǵalysyn qamtamasyz etýdi jáne qalanyń damýyna ınvestıtsııa tartýdy kózdeıtin sharalar ázirledi.
Ulttyq qordyń ınvestıtsııalyq kirisi birinshi jartyjyldyqta 2,3 mıllıard dollarǵa jetti. BJZQ-nyń zeınetaqy aktıvteri jyl basynan beri 1,7 trıllıon teńgege ulǵaıyp, 27,8 trıllıon teńgeni qurady.
Memleket basshysyna tsıfrlyq qarjy aktıvteri ındýstrııasy men Ulttyq tsıfrlyq qarjy ınfraqurylymyn damytý boıynsha tapsyrmalarynyń oryndalý barysy tanystyryldy. Transshekaralyq tólem jasaý úshin steıblkoındi qoldaný, ınfraqurylymdy damytý men tokendelgen memlekettik aktıvterdi shyǵarý jańa baǵyttar retinde ataldy.
Sondaı-aq tólem naryǵynyń jańa segmenti – lıtsenzııalanatyn birinshi sanattaǵy tólem uıymdary qoldanysqa engizildi. Bul básekelestikti yntalandyrýǵa múmkindik berip, klıentterdiń shyǵyndaryn azaıtady jáne halyq pen bıznes úshin ınnovatsııalyq tsıfrlyq servısterdiń qoljetimdiligin keńeıtedi.
19 shildeden bastap Ulttyq tólem júıesi aıasynda kez kelgen banktiń klıentterine ózara QR arqyly tólem jasaýǵa jáne telefon nómiri boıynsha aqsha aýdarýǵa múmkindik beretin tetik iske qosyldy. Júıe jumys isteı bastaǵan sátten beri jalpy somasy 170 mıllıard teńge bolatyn 6,5 mıllıon operatsııa óńdeldi.
Tımýr Súleımenovtiń aıtýynsha, Ulttyq bank baǵa turaqtylyǵyn qamtamasyz etip, ınflıatsııany orta merzimde 5 paıyzǵa deıin tómendetý úshin barlyq qajetti sharany qabyldap jatyr.
Kezdesý sońynda Prezıdent Ulttyq bank qyzmeti boıynsha birqatar mindet júktep, ınflıatsııany odan ári turaqtandyrýdyń mańyzyna nazar aýdardy.
Aıta keteıik, osyǵan deıin Prezıdent «Báıterek» holdınginiń damý josparymen tanysty.
