Prezıdent: Ult múddesin qorǵap júrgen jýrnalısterdiń Parlament tórinde otyrýy – zańdylyq

ASTANA. KAZINFORM – Memleket basshysy Qasym-Jomart Toqaev BAQ salasy qyzmetkerlerin marapattaý rásiminde sóılegen sózinde jýrnalısterdiń memlekettik basqarý salasynda tabysty eńbek etýine múmkindik mol ekenin aıtty.

«Jýrnalıster qaýymy ulttyq parlamentarızmdi damytýǵa qashan da zor úles qosyp keledi. Qazirgi depýtattar quramynda aqparat salasynyń ókilderi jetkilikti. Atap aıtqanda, Nurtóre Júsip, Ermurat Bapı, Qazybek Isa, Sergeı Ponomarev, Janarbek Áshimjan, Bıbigúl Jeksenbaı, Aıgúl Qapbarova sekildi áriptesterińiz kópshilikke belgili. Ult múddesin qorǵap júrgen jýrnalısterdiń Parlament tórinde otyrýy – zańdylyq», - dedi Qasym-Jomart Toqaev.

Prezıdenttiń sózinshe, Prezıdent Ákimshiliginde de jýrnalıster az emes. 

«Olar óz kásibı ortasyna qoldaý bildirip, buqaralyq aqparat quraldary men memlekettik organdar arasynda altyn kópir qyzmetin atqarady. Jańa aqparattyq dáýirge qadam bastyq. Osy oraıda memlekettik basqarý júıesi sóz biletin, tıimdi ári jan-jaqty qarym-qatynas ornata alatyn adamdarǵa zárý. Sondyqtan óz mansabyn memlekettik qyzmetpen baılanystyrǵan nemese baılanystyrýdy josparlap júrgen áriptesterińiz osy salada da óz áleýetin tolyq júzege asyra alady», - dedi Memleket basshysy.