Prezıdent úlken qurylys qozǵalysyna «Halyqtyq qurylys» degen ataý berýdi usyndy
ASTANA. KAZINFORM — Qazaqstan halqyna Joldaýyn jarııalaý kezinde Prezıdent Qasym-Jomart Toqaev elimizde qarqyndy qurylys júrgizip, áleýmettik nysandar salý jóninde málimdedi.
– Ulttyq qordyń resýrsyn jınaqtaý jáne ony paıdalaný arasynda teńgerim saqtalýǵa tıis. Qarajatty tek qoǵamǵa barynsha paıdaly dúnıege ǵana jaratý kerek. Eń bastysy, jumsalǵan aqshanyń ekonomıkalyq jáne áleýmettik qaıtarymy bolýy qajet. Óıtkeni bólinetin memleket qarajatynyń negizgi maqsaty – halyqtyń ál-aýqatyn kóterý, – dedi ol.
Prezıdenttiń sózinshe, tıisti jobalardy júzege asyrýǵa materıaldyq-tehnıkalyq jaǵdaıy jaqsy jáne mol tájirıbesi bar jergilikti jerdegi shaǵyn jáne orta bıznes ókilderin tartqan jón. Búkil qurylystyń barysy qatań baqylaýǵa alynady.
– Birinshi kezekte aımaqtarda 70-ke jýyq densaýlyq saqtaý nysany salynady. Perzenthanalar, aýrýhanalar, jedel medıtsınalyq kómek kórsetý stantsııalary, balalarǵa arnalǵan ońaltý ortalyqtary men erekshe balalardyń suranysyna saı sportzaldar boı kóteredi. Sondaı-aq 50-ge jýyq bilim berý, sport jáne mádenıet mekemeleriniń qurylysy bastalady. Osyndaı asa qajetti, sapaly nysandardyń qurylysyn jedel túrde bastap, kóp uzamaı iske qosýymyz kerek, – dedi Memleket basshysy.
Budan bólek, turǵyn úı-kommýnaldyq sharýashylyǵy salasyna qomaqty qarjy bólinedi. Kóptegen eldi mekenderge gaz jáne taza aýyz sý tartylady.
– Úkimet jyl sońyna deıin naqty jobalardyń bastapqy tizimin ázirleıdi. Bul tizim barlyq aımaqty qamtýy kerek. Biz halqymyzdyń artyp otyrǵan zor úmitine laıyq bolýymyz qajet. Bul josparymyz el ıgiligin arttyrýǵa arnalyp otyr, basqa astarly oıymyz joq. Sondyqtan osy úlken qurylys qozǵalysyna «Halyqtyq qurylys» degen ataý bersek, qarsylyq bolmas dep senemin. «Halyqtyq qurylys» baǵdarlamasy azamattardyń ál-aýqatyn arttyratyn, kásipkerliktiń órkendeýine, damýyna, ulttyq ekonomıkany jandandyrýǵa zor yqpal etetin tól tarıhymyzdaǵy eń úlken ınfraqurylymdyq joba bolmaq. Atalǵan bastama júz myńdaǵan adamdy jumyspen qamtıdy, onyń ıgiligin tutas halqymyz, ásirese, óskeleń urpaq kóredi dep kámil senemin, – dedi Prezıdent.
Aıta keteıik, buǵan deıin búginde egemendigimizdi qorǵaýǵa qatysty barlyq másele áli tolyqtaı sheshimin tappaǵany jónindegi Prezıdent málimdemesin jarııalaǵanbyz.
