Prezıdent úlken isterge, ıgi tirlik pen bereke-birlikke erekshe mán berip otyr – Aıda Balaeva
NUR-SULTAN. QazAqparat – Prezıdent kótergen «Qaıyrymdy ister marafony» bastamasymen Táýelsizdigimizdiń 30-jyldyq mereıli kezeńiniń shymyldyǵyn ashyp otyrmyz. Bul týraly Aqparat jáne qoǵamdyq damý mınıstri Aıda Balaeva málim etti, dep habarlaıdy QazAqparat tilshisi.
«Ystyq qaırat. Nurly aqyl. Jyly júrek.
Bul ótken jyldyń sońynda el Prezıdenti Qasym-Jomart Kemeluly Toqaevtyń erekshe mán berip, kópshilikke aıtqan Uly Abaıdyń úsh ulyq sózi. Jáı sózder emes, eldi úlken isterge, ıgi tirlik pen bereke-birlikke shaqyrǵan zor úndeýi. Búgin, mine, barshamyz osy ortada ádeıi bas qosyp, osy úndeýdi jalpaq jurtymyzǵa, jany jomart azamattar men júregi keń aǵaıynǵa – jalpy qazaqstandyqtarǵa arnap otyrmyz. Prezıdentimiz kótergen osynaý ıgilikti bastama – «Qaıyrymdy ister marafonymen» Táýelsizdigimizdiń 30 jyldyq mereıli kezeńiniń shymyldyǵyn ashyp otyrmyz desek qatelespeımiz», - dedi mınıstr.
Onyń paıymynsha, qaıyrymdylyq, metsenattyq jáne donorlyq – bizdiń qoǵam úshin eń mańyzdy baǵyttardyń biri.
«Sondyqtan da, Prezıdentimiz Táýelsizdiktiń 30 jyldyǵyn keń kólemde atap ótýde halyq birligin arttyryp, eldi uıystyrýǵa arnalǵan izgi jobalarǵa basymdyq berýge shaqyrǵan», - dedi A. Balaeva.
Budan buryn habarlanǵandaı , búgin elordada donorlar men metsenattardyń qatysýymen «Qaıyrymdy ister» marafony bastaldy.
Aıta keteıik, «Qaıyrymdy ister» marafony bastamasyn Memleket basshysy Qasym-Jomart Toqaev kótergen bolatyn.
