Prezıdent: Úleskerlik qurylys problemalary jyl sońyna deıin naqty sheshimin tabý kerek

ASTANA. KAZINFORM – Prezıdent atyna úleskerlik qurylystaǵy zańsyzdyqtar týraly shaǵym kóp túsýde. Memleket basshysy Qasym-Jomart Toqaev Úkimettiń keńeıtilgen otyrysynda osyndaı mámilet aıtty.

«Qazir qurylys salasynda saraptama jasaýdy memlekettiń ıeligine qaıtarý máselesi qyzý talqylanyp jatyr. Azamattardyń qaýipsizdigin qamtamasyz etý – eń basty mindet. Qurylys sapasyna jasalatyn baqylaýdy mindetti túrde kúsheıtý kerek. Bul – anyq dúnıe. Alaıda, memleket osy naryqty túgel ıemdenip almaýy qajet. Shynaıy báseke bolýǵa tıis. Úkimet barlyq taraptyń múddesin eskerýi kerek», - dedi Memleket basshysy.

Qasym-Jomart Toqaev quzyrly organdar úleskerlik qurylystaǵy bylyqtardy áli retteı almaı otyrǵanyn atap ótti.

«Bul salada úleskerlik qurylysqa, ǵımarattardyń zańsyz ári orynsyz salynýyna, múlik ıeleriniń birlestigin reformalaýǵa qatysty qordalanǵan máseleler bar. Azamattar únemi shaǵymdanyp jatady. Alaıda, quzyrly organdar áli kúnge deıin tıisti shara qoldanbaı otyr. Úkimet bul másele boıynsha jyl sońyna deıin naqty sheshim qabyldaýy kerek», - dedi Prezıdent.

Aıta keteıik, Úkimet úıinde qaıta jasaqtalǵan Úkimettiń keńeıtilgen otyrysy ótip jatyr.