Prezıdent Qasym-Jomart Toqaev UQShU Ujymdyq qaýipsizdik keńesiniń otyrysyna qatysty
ASTANA. KAZINFORM — Máskeýde UQShU Ujymdyq qaýipsizdik keńesiniń kezekti otyrysy ótti. Bul týraly Aqorda habarlady.
Sammıtke Qazaqstan Prezıdentimen birge Reseı Federatsııasynyń Prezıdenti Vladımır Pýtın, Belarýs Respýblıkasynyń Prezıdenti Aleksandr Lýkashenko, Qyrǵyz Respýblıkasynyń Prezıdenti Sadyr Japarov, Tájikstan Respýblıkasynyń Prezıdenti Emomalı Rahmon, sondaı-aq UQShU Bas hatshysy Taalatbek Masadykov qatysty.
Memleketter basshylary UQShU aıasyndaǵy yqpaldastyqtyń negizgi aspektilerin qarastyryp, Uıymnyń 2026 jyly atqarǵan qyzmetiniń nátıjesine baǵa berdi ári aldaǵy kezeńge arnalǵan jumystyń basty baǵyttaryn aıqyndady.
Sondaı-aq prezıdentter halyqaralyq jáne óńirlik qaýipsizdiktiń ózekti máseleleri jóninde pikir almasty.
Qasym-Jomart Toqaev qonaqjaılyq tanytqany úshin Vladımır Pýtınge rızashylyǵyn bildirip, Reseı tarapynyń bıyl UQShU-ǵa óte nátıjeli tóraǵalyq etkenin atap ótti.
Prezıdent halyqaralyq terrorızmmen kúres, esirtki zattarynyń zańsyz aınalymyna qarsy is-qımyl, sondaı-aq jasandy ıntellekt tehnologııasynyń yqpaly ulǵaıyp kele jatqanyn eskere otyryp, aqparattyq qaýipsizdikti nyǵaıtý baǵyttary boıynsha kúsh-jiger jumyldyrý qajet ekenine nazar aýdardy.
Qazaqstan Prezıdenti sóz sońynda UQShU-ǵa tóraǵalyq etetin Tájikstannyń kóshbasshysy Emomalı Rahmondy quttyqtap, osy jaýapty mıssııany atqarýda sáttilik tiledi.
Jıyn qorytyndysy boıynsha Ujymdyq qaýipsizdik keńesiniń deklaratsııasy qabyldandy.
Sonymen qatar UQShU-ǵa múshe memleketterdiń ortaq múddesine saı ujymdyq qaýipsizdikti odan ári nyǵaıtýdy kózdeıtin birqatar qujatqa qol qoıyldy.
Úlken Kreml saraıynda UQShU Ujymdyq qaýipsizdik keńesiniń otyrysy bastalǵanyn jazǵan bolatynbyz.
