Prezıdent Ýkraınadaǵy jaǵdaı týraly: Eki alpaýyt eldiń saıası suhbat júrgize bastaýy — jaqsy úrdis

ASTANA. KAZINFORM – Memleket basshysy Qasym-Jomart Toqaev Ýkraına tóńiregindegi jaǵdaıǵa qatysty pikir bildirdi, dep habarlaıdy Aqordanyń baspasóz qyzmeti.

Qasym-Jomart Toqaev Ýkraına tóńiregindegi jaǵdaı týraly pikir bildirip, elimizdiń tynyshtyǵy men turaqtylyǵy eń basty qundylyq ekenine nazar aýdardy.

— Biz «Birligimiz — áralýandyqta» ıdeologııasyn temirqazyq etip ustanyp otyrmyz. Ultymyz ben nanym-senimimiz ártúrli ekenine qaramastan, bir qoǵamda tutas halyq bolyp ómir súremiz. Men barshańyzdy osynaý tereń úderisti tolyq túsinýge shaqyramyn. Sonda ǵana tabysqa jete alamyz. Qazir Ýkraına jóninde kóp aıtylyp jatyr. Biz alǵashqy kezden bastap osy soǵysty mindetti túrde toqtatý kerek, dıplomatııalyq kelissózder arqyly bir mámilege kelý qajet dep aıttyq. Bul ustanymymyz endi shyndyqqa aınaldy. Eki alpaýyt el saıası suhbat júrgize bastady. Bul — jaqsy úrdis. Ári Qazaqstanǵa paıdasyn tıgizedi. Sondyqtan biz muny meılinshe qoldaımyz, — dedi Prezıdent.

Aıta keteıik, búgin Prezıdent «Jumysshy mamandyqtarynyń qalasy» festıvaline bardy. EXPO kórme alańynda bolashaq mamandardyń, jumys berýshiler men kásiptik-tehnıkalyq uıymdardyń basyn qosqan «Jumysshy mamandyqtarynyń qalasy» festıvali ótip jatyr.