Prezıdent: Úkimettiń birinshi kezektegi mindeti — batyl, kúmánsiz sheshimder qabyldaý úrdisin jańǵyrtý

ASTANA. KAZINFORM — Úkimet, ortalyq jáne jergilikti atqarýshy organdar óz jaýapkershiligin tolyq sezinip jumys isteýi tıis. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

— Aldymyzda aýqymdy, mańyzdy mindetter tur. Biz árdaıym bir qadam alda júrýimiz kerek. Oılanyp-tolǵanyp otyratyn ýaqyt joq. Batyl, tıimdi sheshim qabyldap, ony jedel júzege asyrý qajet. Shyn aıtqanda, búgingi qaralyp jatqan máseleler — belgili, olar Joldaýymda da, Ulttyq quryltaıda da kóterildi. Úkimet músheleri, ıá bolmasa aınalamyzda júrgen «sarapshylar» el ekonomıkasynyń aldynda turǵan túıtkilderdi sheshý jolyn tez arada usynady dep kútýdiń qajeti joq degen sııaqty paıymdaýlar bar ekenin biz jaqsy bilemiz, — dedi Qasym-Jomart Toqaev.

Memleket basshysynyń paıymynsha, básekege qabiletti el bolýymyz kerek. Básekege qabiletti bolsaq, bolashaǵymyz da jarqyn bolady.

— Negizgi basymdyqtarymyz ózgermeıdi. Azamattardyń tabysyn arttyryp, turmys sapasyn jaqsartý basty mindet bolyp qala beredi. Úkimet, ortalyq jáne jergilikti atqarýshy organdar óz jaýapkershiligin tolyq sezinip jumys isteýi tıis. Úkimettiń birinshi kezektegi mindeti — batyl, kúmánsiz sheshimder qabyldaý úrdisin jańǵyrtý. El ıgiligi jáne azamattardyń múddesi úshin eńbek etý qajet. Árbir tapsyrma ýaqtyly ári sapaly oryndalýy kerek. Eń bastysy, elge paıdasy tıetin naqty nátıje bolýǵa tıis, — dedi Prezıdent.

Buǵan deıin Prezıdent memleket jeke kapıtal rólin ózine alýdan bas tartýy qajettigin aıtqan edi.