Prezıdent Úkimettiń agrarlyq saıasatyn synady

ASTANA. KAZINFORM — Úkimettiń baǵany retteýge qatysty sózi men isi qabyspaı jatyr. Memleket basshysy Qasym-Jomart Toqaev Úkimettiń keńeıtilgen otyrysynda osyndaı syn aıtty.

— Agroónerkásip keshenin qoldaý sharalary qordalanǵan máselelerdi sheshý úshin emes, tek osy saladaǵy jalpy ónimdi arttyrý úshin qabyldanyp jatyr deýge bolady. Sonyń saldarynan áli kúnge deıin azyq-túlik ımportyna táýeldi bolyp otyrmyz, baǵa da ósýde. Atqarýshy bılik buǵan tosqaýyl qoıý úshin negizinen ákimshilik sharalarǵa júginedi. Úkimet osyǵan deıin áleýmettik mańyzy bar azyq-túlik baǵasyn tikeleı retteýden bas tartatyny týraly aıtty. Soǵan qaramastan, mundaı taýarlar sany 19-dan 31-ge deıin kóbeıdi, — dedi Memleket basshysy.

Qasym-Jomart Toqaev baǵasy retteletin taýarlardyń tizimin keńeıtý ýaqytsha ǵana shara bolý kerektigin basa aıtty.

— Úkimet bul sheshimdi ýaqytsha shara dep túsindirdi. Biraq ýaqytsha dep bastalǵan shara ádettegideı turaqty sıpatqa ıe bolyp ketpeýi kerek. Aýyl sharýashylyǵy ónimderiniń eksportyna da naryqqa qaıshy shekteýler qoıylǵan. Sheshimdi qabyldar aldynda onyń saldary qandaı bolatynyn eshkim oılamaıdy. Ne sebepti bulaı jasalyp jatqanyn túsiný qıyn emes. Sebebi naryqty damytqannan góri oǵan shekteý qoıý — áldeqaıda ońaı. Mundaı áreketti toqtatý kerek. Úkimet bıznes qaýymdastyǵymen birlese otyryp, tamaq ónerkásibin damytýǵa qatysty júıeli sharalar qabyldaýy tıis, — dedi Prezıdent.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Jıynda eldiń 2025 jylǵy áleýmettik-ekonomıkalyq damýy qorytyndylanyp, Úkimettiń aldaǵy kezeńge arnalǵan negizgi mindetteri aıqyndalady.