Prezıdent Úkimetke «Torǵaı - Yrǵyz» jáne batys baǵytyndaǵy qurylysty jedeldetýdi tapsyrdy

ASTANA. KAZINFORM — Prezıdent Úkimetke «Torǵaı - Yrǵyz» jáne batys baǵytyndaǵy basqa da avtokólik joldarynyń qurylysyn jedeldetýdi tapsyrdy.

Bul týraly óziniń Telegram arnasynda QR Prezıdentiniń kómekshisi – Baspasóz hatshysy Rýslan Jeldibaı jazdy.

Aıta keteıik, Qostanaı oblysynda strategııalyq mańyzdy «Ortalyq-Batys» avtokólik dálizi salynyp jatyr.

Qurylys jumystary maýsym aıynda birden eki jerde bastaldy. Onyń biri Arqalyq qalasynda bolsa, ekinshisi Qostanaı oblysy Jankeldi aýdany Torǵaı aýylynda.

Qurylys jumystary jalpy uzyndyǵy 865 km bolatyn «Astana — Janteke — Egindikól — Arqalyq — Torǵaı — Yrǵyz» baǵytyn quraıdy.

Osyǵan deıin jańa kólik dálizi eldiń ortalyǵy men batysyn tikeleı jalǵap, Transkaspıı halyqaralyq kólik baǵytyna jol ashatyny aıtyldy.

Joba júzege asatyn bolsa, Astana men Yrǵyz arasyndaǵy jol 573 kılometrge qysqarady.