Aýyl mektebine jyldamdyǵy joǵary ınternet jetkizý — Prezıdent Úkimetke shuǵyl mindet júktedi
«Elimizdegi barlyq aýyl mektebine jyldamdyǵy joǵary ınternetti qoljetimdi etý máselesin sheshý asa mańyzdy». Respýblıkalyq pedagogter sezinde Memleket basshysy Qasym-Jomart Toqaev Úkimetke shuǵyl mindet júktedi, dep habarlaıdy QazAqparat Aqordaǵa silteme jasap.
«Altynshy. Bilim berý úderisin tsıfrlandyrý qarqynyn jedeldetý mańyzdy. Shyn máninde, Qazaqstanda álemniń bedeldi oqý oryndarymen básekelese alatyn myqty mektepter bar. Biraq ondaı bilim oshaqtarynda balalarymyzdyń júzden bir bóligi ǵana oqıdy. Al tsıfrlyq sheshimder ozyq pedagogıkalyq tájirıbeni tez ári tıimdi túrde keńinen taratýǵa múmkindik beredi. Sol arqyly, tipti, shalǵaı aýdandardaǵy oqýshylardy elimizdiń jáne álemniń úzdik ustazdarynyń materıaldarymen jáne sabaqtarymen qamtamasyz etýge bolady. Sondyqtan, elimizdegi barlyq aýyl mektebine jyldamdyǵy joǵary ınternetti qoljetimdi etý máselesin sheshý asa mańyzdy. Bul – Úkimettiń aldyndaǵy shuǵyl mindet», - dedi Prezıdent.
Memleket basshysynyń tapsyrmasy alty aıda oryndalýy tıis.
«Aýyl mektepterin jyldamdyǵy joǵary ınternetpen qamtamasyz etý – Tsıfrlyq damý mınıstrligine de, oblys ákimderine de júkteletin jaýapkershilik. Alty aıdan keıin berilgen tapsyrmanyń oryndalýyn tekseremin.
Jalpy, bilim berý júıesin múlde jańa deńgeıge shyǵarý úshin aýqymdy tsıfrlyq transformatsııalaý jumystaryn júrgizýimiz kerek. Eń aldymen, 2027 jylǵa deıin ınternet jelisi áli tartylmaǵan mektepterdiń bárin jyldamdyǵy joǵary ınternetke qosý qajet. Bul rette olardyń árqaısysynda jergilikti jeli ornatylýy kerek.
Bul ózekti máseleni sheshýge «Qoljetimdi ınternet» ulttyq jobasy septigin tıgizedi. Sonymen qatar, barlyq mektep oqýshysyna sapaly oqytý kontenti bar ozyq tsıfrlyq platformalardyń, sonyń ishinde elektrondy oqýlyqtardyń qol jetimdiligin qamtamasyz etý qajet. Bul rette barlyq materıal salalyq saraptamadan muqııat ótkizilýi kerek», - dedi Qasym-Jomart Toqaev.
Osy oraıda, Prezıdent metsenattardy aýyl mektepterine demeýshilik etýge shaqyrdy.
«Qaıyrymdylyqpen aınalysatyn azamattardy, eń aldymen aýyl mektepterine kómektesýge shaqyramyn. Muǵalimderdi negizgi tsıfrlyq quraldardy qoldana bilýge úıretý mańyzdy. Árbir ustaz tek óz pánin jetik bilip qana qoımaı, keń múmkindikterge jol ashatyn zamanaýı tehnologııalardy da meńgerýge tıis.
Oqý protsesinde tsıfrlyq sheshimderdi qoldaný qalypty jaǵdaıǵa aınaldy. Qashyqtan oqytý júıesin belsendi túrde engizý qajet. Dástúrli jáne onlaın formattardy ushtastyrý balalardyń aqparatty óz betinshe izdeý daǵdysyn damytyp, mekteptegi ortaǵa beıimdelý múmkindikterin saqtaýǵa yqpal etedi.
Qashyqtan oqytý kóptegen elde sátti qoldanylyp keledi. Pandemııa kezinde bizde de osyndaı tájirıbe boldy. Onlaın oqytý júıesin odan ári damytý úshin tıisti quqyqtyq negiz qalaýymyz qajet», - dedi Memleket basshysy.
Aıta ketsek, búgin Qazaqstanda Ustazdar kúni.
Prezıdent Qasym-Jomart Toqaev respýblıkalyq pedagogter sezinde sóz sóıledi.
