Prezıdent Úkimetke ónerkásiptik qaýipsizdik normalarynyń saqtalýyn tekserýdi tapsyrdy
ASTANA. KAZINFORM - Memleket basshysy Ulytaý oblysyndaǵy «Qazaqmys» korporatsııasyna qarasty kenishte bolǵan qaıǵyly oqıǵaǵa baılanysty eńbek qaýipsizdigi salasynda qatań saqtalýǵa tıis jaǵdaılarǵa nazar aýdardy. Bul týraly Aqordanyń baspasóz qyzmeti habarlady.

- Bekitilgen talaptardyń óreskel buzylǵan faktileri bar. Nysandardyń ónerkásiptik qaýipsizdik júıesimen jabdyqtalý deńgeıi óte tómen. Kompanııalar eńbek qaýipsizdigin qamtamasyz etýge baǵyttalǵan jobalarǵa tıisti mólsherde ınvestıtsııa salmaıdy. Munyń barlyǵy tehnogendi apattarǵa, jumysshylardyń qaza tabýy men jaraqat alýyna ákep soqtyrady, - delingen habarlamada.
Prezıdent qaterli óndiris oryndarynda jumys isteıtin azamattardyń qaýipsizdigin qamtamasyz etý boıynsha Úkimetke mynadaı sharalar qabyldaýdy tapsyrdy:
- Nysandarda ónerkásiptik qaýipsizdik normalarynyń saqtalýyna qatysty tekserý júrgizý;
- Atalǵan nysandarǵa zamanaýı qaýipsizdik júıesin, sonyń ishinde gaz belgi berý qurylǵylaryn, seısmıkalyq qondyrǵylaryn, pozıtsıonırleý júıesin jáne taǵy basqa tıisti ádis-tásilderdi ázirleý men engizý;
- Boljaý men qulaqtandyrýdyń avtomattandyrylǵan júıesin engize otyryp, nysandardy tsıfrlandyrý;
- Tekserý qorytyndysy boıynsha jer qoınaýyn paıdalanýshylardyń jumys baǵdarlamalaryna túzetýler engizip, zamanaýı ónerkásiptik qaýipsizdik júıesine salynatyn ınvestıtsııa kólemin ulǵaıtý jolyn qarastyrý;
- Ónerkásiptik qaýipsizdik salasyndaǵy baqylaý men qadaǵalaý tetikterin qatańdatý.
Memleket basshysynyń bul tapsyrmalaryn Prezıdent Ákimshiligi erekshe baqylaýda ustaıdy.
Eske sala ketsek, 17 aqpanda Ulytaý oblysyndaǵy shahtada apat bolyp, 7 adam tótenshe jaǵdaıda qalǵan edi.
Kóp uzamaı jumysshylardyń barlyǵy mert bolǵany anyqtaldy.
Memleket basshysy Ulytaý oblysynda kenshilerdiń qaza tabýyna baılanysty kóńil aıtty.
Ulytaý oblysynda shahtanyń opyrylýyna baılanysty úkimettik komıssııa quryldy.
Qaza tapqan kenshilerdiń otbasylaryna járdemaqylar men tólemder taǵaıyndalady.
Búgin «Qazaqmys» korporatsııasy kenishtegi apat ornynda jumys istegen avarııalyq-qutqarý brıgadalary taý jynysy opyrylmaǵanyn anyqtaǵany týraly málimdedi.