Prezıdent Úkimetke memlekettik menshik tizilimin qaıta qaraýdy tapsyrdy
ASTANA. KAZINFORM – Jekeshelendiriletin kásiporyndar týraly aqparat qoljetimdi emes. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.
«Jekeshelendirý tıimdi júrgizilgen jaǵdaıda ǵana ekonomıkanyń barynsha erkin damýyna jol ashylady. Bul másele boıynsha kóptegen jospar jasaldy, degenmen, «baıaǵy jartas – sol jartas» kúıinde qalyp tur. Sebebi bul jospardyń bári qur tizim retinde ázirlendi. Onda múlikti ıelikten shyǵarý qajettigine taldaý jasalǵan joq, jekeshelendirýdiń naqty sharttary da anyqtalmaǵan», - dedi Prezıdent.
Memleket basshysy jekeshelendiriletin kásiporyndar týraly aqparat qoljetimdi emestigin basa aıtty.
«Jekeshelendirý tásilin tańdaý tártibi de tolyq rettelmegen. Bul jaǵdaı sybaılas jemqorlyq qaýpin týyndatady. Úkimetke memlekettik menshik tizilimin qaıta qaraýdy jáne jekeshelendirý úderisiniń ádis-tásilin naqtylaýdy tapsyramyn», - dedi Qasym-Jomart Toqaev.
