Prezıdent Úkimetke kómir óndirisin damytýdyń ulttyq jobasyn bekitýdi tapsyrdy

QYZYLORDA. KAZINFORM – Memleket basshysy Qasym-Jomart Toqaev V Ulttyq quryltaıda Úkimetke 20 naýryzǵa deıin kómir óndirisin damytýdyń ulttyq jobasyn bekitýdi tapsyrdy.

- Qazaqstanda óndiriletin 123,1 mıllıard kılovatt/saǵat kóleminde elektr energııasy bizdiń barlyq josparymyzdy tabysty oryndaýǵa jetkiliksiz ekeni anyq. Men bul týraly Qaýipsizdik Keńesiniń jaqynda ótken otyrysynda naqty aıttym. Basqasha aıtqanda, bizdiń elimizdiń básekelestik artyqshylyqtary tıisti túrde iske asyrylmaǵan. Qazaqstanda kómirdiń orasan zor qory bar – shamamen 33 mıllıard tonna. Qazirgi tutyný deńgeıimen bul kómir qory 300 jylǵa jetedi. Jyl saıynǵy óndirý 110 mıllıon tonnadan asady, - dedi Memleket basshysy.

Qasym-Jomart Toqaev kómirdi ekologııalyq taza otyn deńgeıine jetkizetin tehnologııalardyń mańyzyna da toqtaldy.

- Kómir – bizdiń strategııalyq aktıvimiz. Jańa tehnologııalar arqyly qorshaǵan ortaǵa zııanyn beıtaraptandyra otyryp, kómir qorynyń áleýetin tolyq paıdalaný qajet. Kómir óndirisin damytýǵa ulttyq joba mártebesin berý kerek. Úkimet bul máseleni 20 naýryzǵa deıin sheshsin, - dedi Prezıdent.

Aıta keteıik,  Memleket basshysy ekonomıka men energetıka salalarynda kadrlyq aýys-túıis bolýy múmkin ekenin aıtty.