Prezıdent Úkimetke ındýstrııadaǵy JI-mindetterdi udaıy jańartý tártibin ázirleýdi tapsyrdy
ASTANA. KAZINFORM — Qasym-Jomart Toqaev Úkimetke ulttyq kompanııalarmen jáne jeke bıznespen birge ındýstrııadaǵy ózekti JI-mindetterdi aıqyndaý jáne udaıy jańartý tártibin ázirleýdi tapsyrdy. Bul týraly Aqorda habarlady.
Sodan keıin Prezıdent birqatar basty mindetterdi atady.
– Bizge jasandy ıntellektini paıdalana otyryp, óndiristik úderisterdi keshendi túrde transformatsııalaý qajet. Qazirgi kezde kóptegen kásiporynda tsıfrlandyrý jumystary shashyrańqy júrgizilip jatyr. Jekelegen operatsııalardy avtomattandyryp, jańa qyzmetterdi engizgenimizge qaramastan, óndiris modeli kóp jaǵdaıda ózgerissiz qalady. Mundaı tásil ózin ózi aqtamaıdy. Kásiporyndar búkil óndiris tizbegin qaıta qarap, qaı tusta JI kómegimen tıimdilikti barynsha arttyrýǵa bolatynyn aıqyndaýy kerek. Úkimet «Samuryq-Qazyna» qorymen birlesip, negizgi bıznes-úderisteri jasandy ıntellekt arqyly jan-jaqty transformatsııaǵa ushyraıtyn kásiporyndardy anyqtaǵany jón. Jańa tehnologııalar óndiristi basqarý júıesine tikeleı kirigýge tıis. Anaǵurlym sátti modelderdi búkil el aýmaǵynda taratýǵa bolady, – dedi Qasym-Jomart Toqaev.
Memleket basshysy qoldanbaly ǵylymdy kúsheıtýge úndedi. Ol Keńestiń osyǵan deıingi otyrysynda JI salasyna mamandanǵan zertteý ýnıversıtetin qurý týraly sheshim qabyldanǵanyn eske saldy.
– Qazaq AI Research University joǵary sanatty mamandar daıarlaıtyn ortalyq qana emes, qoldanbaly zertteýler júrgiziletin jetekshi alańdardyń biri bolýǵa tıis. Onyń búkil ǵylymı-zertteý baǵdarlamasy ekonomıkalyq damýdyń naqty qajettilikterine beıimdelýi kerek. Bul úshin ónerkásip salasyndaǵy jasandy ıntellektige qatysty ózekti mindetter tizimin jańartyp otyramyz. Atalǵan iste bıýrokratııaǵa jol berýge bolmaıdy. Mundaı mindetterdi óndiristiń aldyńǵy shebinde júrgen ınjenerler, tehnologtar, sheberler men operatorlar anyqtaýy qajet. Qaı jerde shyǵyn baryn, qandaı qurylǵy toqtap turǵanyn, qaı tusta olqylyqtar oryn alyp, qaterler paıda bolǵanyn osy mamandar biledi. Osylaısha, basshylyq óndiristegi problemadan jan-jaqty habardar bolady. Al bul, óz kezeginde, jasandy ıntellektini qaı jerde, qalaı paıdalaný jolyn belgileýge kómektesedi. Qazaq AI Research University, sondaı-aq basqa da ýnıversıtetter men ǵylymı-zertteý ınstıtýttary osy tizimdi basshylyqqa alýǵa tıis. Sonda ǵana ǵylym men óndiris arasynda tikeleı baılanys ornaıdy. Úkimetke ulttyq kompanııalarmen jáne jeke bıznespen birge ındýstrııadaǵy ózekti JI-mindetterdi aıqyndaý jáne udaıy jańartý tártibin ázirleýdi tapsyramyn, – dedi Prezıdent.
