Prezıdent: Úkimet pen ákimder jumysynyń tıimdiligin azamattardyń turmys sapasyna qaraı baǵalaımyz

ASTANA. KAZINFORM — Memleket basshysy Qasym-Jomart Toqaev Úkimettiń keńeıtilgen otyrysyn asha otyryp, álemdegi kúrdeli ahýalǵa toqtaldy.

— Búgin biz Úkimettiń keńeıtilgen otyrysynda óte ózekti máselelerge toqtalamyz. Sebep — bárimizge belgili. Qazir dúnıe júzi túbegeıli ózgeriske ushyrap jatyr. Jahandyq úderister, eń aldymen, elimizdiń ekonomıkalyq ahýalyna áserin tıgizetini anyq. Jappaı tsıfrlandyrý dáýiri, ıaǵnı jańa tehnologııalyq kezeń bastaldy. Kúlli álem múldem basqa jaǵdaıda ómir súredi. Biz soǵan mindetti túrde daıyn bolýymyz kerek. Jańa tehnologııalyq ahýalǵa saqadaı saı turýymyz qajet. Bul — elimizdiń básekege qabiletin arttyryp, turaqty damýyna jol ashatyn asa mańyzdy faktor, — dedi Prezıdent.

Qasym-Jomart Toqaev Úkimet búgingi otyrysta Úkimet aldynda turǵan jańa mindetter aıqyndalatynyn atap ótti.

— Úkimet pen ákimderdiń jumysy qanshalyqty tıimdi ekenin aldymen ekonomıkanyń damý kórsetkishteri men azamattardyń turmys sapasyna qaraı baǵalaımyz. Osy jumystyń nátıjesi byltyr qandaı boldy? Negizgi mindetter oryndaldy ma? Búgin osy suraqtarǵa toqtalamyz jáne jaqyn arada sheshimin tabýǵa tıis ózekti máselelerdi talqylaımyz, — dedi Memleket basshysy.

Aıta keteıik elordada Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.