Prezıdent Úkimet múshelerine: «Turkistan» gazetine bergen suhbatymdy, Ulttyq quryltaı otyrysyndaǵy sózimdi tolyq túsinbegenderińiz baıqalady

ASTANA. KAZINFORM — Salyq organdary men salyq tóleýshiler arasynda seriktestik jáne ózara senim qaǵıdaty ornyǵýy tıis. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

— Jazalaýshy mentalıtetten arylatyn kez keldi. Salyq organdary men salyq tóleýshiler arasynda seriktestik jáne ózara senim qaǵıdaty ornyǵýy tıis. Memleket pen bıznestiń tıimdi yqpaldastyǵyn jolǵa qoıý kerek. Mundaı seriktestik ádildikke, ózara tıimdilikke, tipti ekonomıkany damytýdyń mańyzyn túsiný turǵysynan alǵanda jaýapkershilikke qurylýy tıis dep oılaımyn. Bul jóninde jaqynda «Turkistan» gazetine bergen suhbatymda aıttym. Úkimettiń keıbir múshelerimen áńgimeden uqqanym, ony bári birdeı yqylas qoıyp oqymaǵan sekildi. Qyzylordada ótken Ulttyq quryltaı otyrysyndaǵy sózimdi de tolyq túsinbegenderińiz baıqalady, — dedi Memleket basshysy.

Prezıdenttiń aıtýynsha, Internet uzaq mátinderdi oqýdan alystatty. Onyń ústine kitaptar men maqalalardy oqymaı-aq, mazmunyn tyńdaı salatyn múmkindik paıda boldy.

— Biraq bul memlekettik qyzmetkerlerge jaraspaıtyn ádet. Oqý kerek. Áıtpese, zeınet jasyna jetken kezde, oılaný qabiletinen aıyrylyp qalasyzdar, — dedi Qasym-Jomart Toqaev.

Buǵan deıin Qasym-Jomart Toqaev Úkimettiń aldyndaǵy negizgi mindetti atady.