Prezıdent Úkimet múshelerine: Tapsyrmany oryndaı almasańyzdar, jeke qurylymdarǵa tapsyryńyzdar

QYZYLORDA. KAZINFORM – Memleket basshysy Qasym-Jomart Toqaev V Ulttyq quryltaıda júk tasymaldaıtyn áýe kompanııasyn qurý týraly tapsyrmasy durys oryndalmaı jatqanyn aıtyp, Úkimettiń sheshimin synady.

- Jahannyń logıstıka kartasynan laıyqty oryn alý úshin júıeli umtylys pen naqty áreket strategııasy qajet. Úkimettiń aldyna avıatsııada, atap aıtqanda, júk avıatsııasynda naqty nátıjelerge qol jetkizý mindeti qoıylǵan bolatyn. Meniń oıymsha, elimiz osy ýaqytqa deıin áýedegi júk tasymalynyń eýrazııalyq ortalyǵyna aınalmaǵany keshirilmeıtin kemshilik, qarapaıym tilmen aıtqanda, absýrd, - dedi Prezıdent.

Qasym-Jomart Toqaev Úkimettiń jýyqtaǵy sheshimi sol absýrdty odan ári ýshyqtyrǵanyn atap ótti.

- Úkimet júk tasymaldaıtyn memlekettik áýe kompanııasyn qurý baǵytynda týraly durys emes sheshim qabyldady. Bul mindet qandaı da bir sebeptermen «Qazaqstan temir joly» kompanııasyna júkteldi. Tapsyrmany oryndaı almasańyzdar, bul máseleni jeke qurylymdarǵa berińizder. Jaqynda ótken keńeıtilgen jınalysta bul máseledegi basty kedergi avıatsııalyq otynnyń baǵasy ekeni, ol kórshi memleketterdiń áýejaılarymen salystyrǵanda básekege qabiletsiz ekeni anyqtaldy. Shıki munaı óndiretin el avıakerosınniń baǵasy boıynsha munaı óndirmeıtin eldermen básekege túse almaıdy. Bul absýrd emes pe?, - dedi Mesmleket basshysy.

Aıta keteıik, Kazinform Memleket basshysynyń Ulttyq quryltaıdaǵy sózin translıatsııalap jatyr.