Prezıdent Úkimettiń káriz-tazartý qurylǵylaryn salýdaǵy jumysyn synady
«Energetıka men jylý jalǵyz problema emes. 5 jyldan astam ýaqyttan beri káriz-tazartý qurylǵysyn salý jáne jańǵyrtý máselesi sheshilmeı keledi. Bastapqyda jobalardy memlekettik-jekeshelik seriktestik tetigi arqyly júzege asyrý josparlanǵan. Alaıda, eki jyldan keıin Úkimet bul ıdeıadan bas tartty. Endi bıýdjettik qarjylandyrý jáne zaım tartý jaıynda sóz bolyp jatyr. Málimdelgen jobalar iske aspaı qaldy. Endigi qapy qalǵan múmkindikti qaıtarýdyń ornyna Úkimet pen ákimdikter jospardy tómendetý týraly sheshim qabyldap, 2025 jylǵa deıin tek 7 jobany júzege asyrýdy kózdep otyr. Al elimizde problemaly 68 káriz-tazartý qurylǵysy bar», - dedi Memleket basshysy.
Qasym-Jomart Toqaev bul problemalardyń basty sebebi tarıf saıasatynyń durys júrgizilmeýi ekendigin basa aıtty.
«Osy saıasat tabıǵı monopolııa qyzmetteriniń sapaly ári qoljetimdi bolýyn qamtamasyz etýge tıis. Bul qyzmettiń tegin bolmaıtyny túsinikti. Nysandardy kútip ustaýǵa jáne jańǵyrtýǵa qajetti qarajat tarıf esebinen bólinýi kerek. Bıznesten shyǵynǵa batyp jumys iste dep talap etý orynsyz. Ár nárse jónimen jasalýǵa tıis. Men bul týraly Joldaýda aıttym. Biraq naqty ári nátıjeli jumys áli atqarylmaı otyr. Jańa tarıf saıasatynyń erejeleri bekitilgen joq. Tarıfterdi qarastyrý jáne kelisý úderisi jabyq esik jaǵdaıynda ótedi. Tabıǵı monopolııa sýbektileriniń mindettemelerdi oryndaý tártibin tıisti deńgeıde qadaǵalaý kerek», - dedi Prezıdent.
Foto: 3blaws.s3.amazonaws.com