Prezıdent Úkimetke tótenshe jaǵdaı týraly habarlaý júıesin jetildirýdi tapsyrdy

NUR-SULTAN. QazAqparat –Prezıdent Qasym-Jomart Toqaev Úkimetke tótenshe jaǵdaı týraly habarlaý júıesin jetildirýdi tapsyrdy, dep habarlaıdy QazAqparat tilshisi.

«Órt týraly habardyń kesh jetkeni týraly aıtsaq, bul áýeli tehnıkalyq problema bolsa kerek. Ol týraly jańa da sóılestik. Úkimetke bul problemany sheshý júkteledi. Tutanǵan órt týraly jáne onyń aýmaǵy týraly naqty aqparatty keshikpeı alý úshin tıisti tehnıkalyq qondyrǵy ornatylýy kerek», - dedi Memleket basshysy Qostanaı oblysynda bolǵan órtti sóndirý jónindegi shuǵyl áreket etý shtabynyń otyrysynda.

Prezıdent órt sóndirýshi mamandardy daıarlaý isine iri bıznestiń de qoldaý kórsetýi kerektigin atap ótti.

«Mınıstr (Tótenshe jaǵdaı mınıstri ıÝrıı Ilın – avt.)tikushaqta maǵan Kókshetaýda maman daıarlaıtyn oqý orny bar ekenin baıandady. Biraq ol mekemeniń tehnıkalyq jabdyqtalýy nashar. Eń áýeli jataqhana joq. Jataqhana bolmasa, stýdentterdi qalaı oqytýǵa bolady? Bul máseleni óte shuǵyl sheshý kerek. Bizdiń tabysty kásipkerler, basqa da materıaldyq múmkindigi jaqsy adamdar birinshi kezekte jataqhana salý máselesin sheshýge kómektesedi dep oılaımyn. Oqý korpýsyn sodan keıin salyp, jaraqtandyramyz», - dedi Qasym-Jomart Toqaev.

Buǵan deıin Memleket basshysynyń Tótenshe jaǵdaılar mınıstrligin qyzmetkerlerin turǵyn úımen qamtamasyz etýge qabiletti ınstıtýt retinde kúsheıtý týraly tapsyrma bergenin jazǵan edik.

Foto: akorda.kz