Prezıdent Úkimetke IT qyzmetter eksportyn 1 mlrd dollarǵa jetkizýdi tapsyrdy

ASTANA. QazAqparat – Parlament palatalarynyń birlesken otyrysynda Prezıdent Qasym-Jomart Toqaev Úkimetke IT qyzmetterdiń eksportyn bir mıllıard dollarǵa jetkizýdi tapsyrdy, dep habarlaıdy QazAqparat tilshisi.

«Ózderińiz bilesizder, men tsıfrlandyrý men ınnovatsııalardy engizý máselesine kóp kóńil bólemin. Bizdiń aldymyzda Qazaqstandy IT elge aınaldyrý deıtin mańyzdy strategııalyq mindet tur. Tsıfrlandyrý salasynda jetistikterimiz bar. Elektrondy úkimet pen fıntehti damytý ındeksi boıynsha álemde kóshbasshylar qataryndamyz», - dedi Memleket basshysy.

Qasym-Jomart Toqaev eldegi IT salanyń eksport kólemi ótken jyly ǵana bes ese óskenin atap ótti.

«Jyl sońyna deıin bul kórsetkish 500 mıllıon dollarǵa jetýi múmkin. Biraq munymen shektelmeýimiz kerek. Úkimettiń aldyndaǵy jańa mindet – 2026 jylǵa qaraı IT qyzmetterdiń eksportyn bir mıllıard dollarǵa jetkizý. Buǵan iri sheteldik IT kompanııalarmen birlesken kásiporyndar ashý járdemdesedi. Úkimet bul másele boıynsha egjeı-tegjeıli usynystar engizýi kerek», - dedi Prezıdent.

Aıta keteıik, Memleket basshysy bul jolǵy Joldaýyn «Ádiletti Qazaqstannyń ekonomıkalyq baǵdary» degen taqyryppen jarııalap otyr.

Buǵan deıin jazǵanymyzdaı, Parlament palatalarynyń birlesken otyrysyna depýtat-mınıstrlermen birge eńbek adamdary da jınaldy.