Prezıdent Úkimetke dándi daqyldardy eksporttaý máselesimen aınalysýdy tapsyrdy

ASTANA. QazAqparat - Búgin Elbasy Nursultan Nazarbaev QR Premer-Mınıstri Baqytjan Saǵyntaevty qabyldady, dep habarlady Aqordanyń baspasóz qyzmeti.

Kezdesý barysynda B.Saǵyntaev Memleket basshysyna eldiń bıylǵy 9 aıdaǵy áleýmettik-ekonomıkalyq damýynyń nátıjeleri jáne basty memlekettik baǵdarlamalardyń oryndalý barysy týraly baıandady.

Qazaqstan Prezıdenti qazirgi ýaqytta júzege asyp jatqan barlyq bastamany kelesi jyly odan ári tıimdi jalǵastyrý úshin qajetti negiz qalyptasqanyn atap ótti.

- Birinshiden, bıýdjetke tıisti ózgerister engizildi. Sondaı-aq, barlyq qajetti memlekettik baǵdarlamalar qabyldandy. Atap aıtqanda, respýblıkanyń qarqyndy ındýstrııalyq-ınnovatsııalyq damýyn qamtamasyz etý jáne tıimdi kólik-logıstıka ınfraqurylymyn qalyptastyrýdy kózdeıtin «Nurly jol» damý baǵdarlamasy aıasynda turǵyndardyń ál-aýqatyn arttyrý úshin sharalar qabyldaýdyń mańyzdylyǵy anyq, - dedi Elbasy.

Baıandamasynda Premer-Mınıstr respýblıkanyń áleýmettik-ekonomıkalyq damýynyń barlyq negizgi kórsetkishteri jóninen oń serpin bar ekenin aıtty.

B.Saǵyntaev Qazaqstan Prezıdentiniń bıylǵy 9 qyrkúıektegi keńeıtilgen Úkimet otyrysynda bergen tapsyrmalarynyń ýaqytynda oryndalyp jatqanyn málimdedi. Atap aıtqanda, el ekonomıkasynyń odan ári damýyna yqpal etý maqsatymen qosymsha 481 mlrd teńge kóleminde qarajat bólý máselesi sheshildi.

Premer-Mınıstr kúnine 90 myń barrel munaı óndiriletin Qashaǵan munaı-gaz ken ornynyń iske qosylǵanyna nazar aýdardy.

Budan bólek, B.Saǵyntaev Elbasyǵa eń aldymen azyq-túlik pen asa qajeti taýarlar baǵasy, turǵyndar men áleýmettik mekemelerdi úzdiksiz jylýmen qamtamasyz etý máselesi, sondaı-aq turǵyn úı qurylysy baǵdarlamasy aıasynda josparlanǵan nysandardy ýaqtyly tapsyrý turaqty baqylaýda ekendigin málimdedi.

Sondaı-aq, Nursultan Nazarbaevqa eldiń eksporttyq áleýetin odan ári arttyrý úshin qabyldanyp jatqan sharalar týraly habarlandy.

Qazaqstan Prezıdenti respýblıkada jıyn-terin naýqanynyń aıaqtalǵanyna toqtalyp, endi Úkimetke astyqty eksporttaý máselesin pysyqtaý qajet ekendigin atap ótti.

- Іri dándi-daqyl ósirýshi bolyp sanalatyn kóptegen elderde eginniń jaqsy shyqqanyn baıqap otyrmyz. Osyǵan baılanysty bul naryqta báseke joǵary bolady. Biz osyǵan deıin birqatar eldermen astyq eksporty jóninde kelisim jasadyq. Osy ýaǵdalastyq aıasynda jetkiziletin ónim kólemin  anyqtap alýý qajet, - dedi Memleket basshysy.

Nursultan Nazarbaev kezdesý qorytyndysy boıynsha birqatar naqty tapsyrma berdi.