Prezıdent Úkimetke daǵdarysqa qarsy jospary ózektendirýdi tapsyrdy
NUR-SULTAN. QazAqparat – Úkimet daǵdarys kezinde jaqsy jumys istedi. Bul týraly koronavırýs indetiniń ekinshi kezeńine daıyndyq máseleleri boıynsha keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Qazaqstan jáne ózge de memleketter buryn-sońdy bolmaǵan daǵdarysty bastan keshirýde. Jalpy, biz eldegi ekonomıkalyq belsendiliktiń synı quldyraýynan jaltara aldyq. Bul jerde Úkimettiń jaqsy jumys istegenin aıtý kerek. Úkimet bıznesti yntalandyrý, halyqtyń álsiz toptaryna kómek kórsetý boıynsha qadamdar qabyldady. Taıaýda Dúnıejúzilik bank eldiń áleýmettik-ekonomıkalq damýynyń negizgi kórsetkishterindegi oń qarqynǵa joǵary baǵa berdi. Degenmen, búkil álemge tónip kele jatqan indettiń ekinshi tolqyny jańa mindetterge májbúrlep otyr. Úkimette kelesi jyly daǵdarysqa qarsy sharalardy jalǵastyrý úshin sharalar jıyntyǵy men tıisinshe resýrstar bolýy tıis», - dedi Memleket basshysy.
Qazaqstan Prezıdenti óziniń tapsyrmasymen áleýmettik-ekonomıkalyq ahýal nasharlaǵan jáne koronavırýs ınfektsııasynyń jańa tolqyny oryn alǵan jaǵdaıda qarsy áreket etýge baǵyttalǵan keshendi jospar daıyndalǵanyn aıtty.
«Biraq, búgingi alańdatarlyq realıı, onyń ishinde Reseıge sanktsııalyq qysymnyń kúsheıýi, Kavkaz mańyndaǵy, kórshiles memleketterdegi ahýaldyń shıelenisýi, ózge de syrtqy faktorlar bizdiń daǵdarysqa qarsy josparlarymyz ben boljamdarymyzda dálme-dál esepke alýdy talap etedi. Úkimetke Ulttyq bankpen birlesip jospardy ózektendirý jáne ony qazannyń sońyna deıin Ákimshilikke kelisýge engizý qajet», - dedi Qasym-Jomart Toqaev.
