Prezıdent Úkimet pen Ulttyq bankke tapsyrma júktedi
NUR-SULTAN. QazAqparat – Ulttyq qor qarajatyn tıimdi ári utymdy ıgerý kerek. Bul týraly respýblıkalyq telearnalardyń efırinen elimizdegi tótenshe jaǵdaıǵa jáne memlekettiń daǵdarysqa qarsy is-sharalaryna baılanysty málimdemesinde Prezıdent Qasym-Jomart Toqaev aıtty, dep habarlaıdy QazAqparat tilshisi.
Memleket basshysy búgingi málimdemesindegi sharalar paketin júzege asyrý úshin Úkimet pen Ulttyq bankke barlyq qajetti qarjy kózderin jumyldyrýdy tapsyrdy. Osy oraıda Memlekettik áleýmettik saqtandyrý memlekettik qory, Ulttyq banktiń resýrstary men tetikteri qamtylmaq.
«Tuńǵysh Prezıdent-Elbasy qurǵan Ulttyq qor qarajatyn tıimdi ári utymdy ıgerý kerek. Qarjyny naqty ekonomıkaǵa jedel jáne týra jetkizý úshin memlekettik damý ınstıtýttary arqyly tikeleı qarjylandyrý múmkindigin eskerý kerek, ıaǵnı «Báıterek», «Agrarlyq nesıe korporatsııasy» jáne basqalary bar», - dedi Memleket basshysy.
Osy oraıda Prezıdent atalǵan tetik basqa da jeńildiktermen qatar eksportqa baǵdarlanǵan qarqyndy ósip kele jatqan ortasha kompanııalarǵa kómekke baǵyttalýy qajettigin jetkizdi.
Qasym-Jomart Toqaev qarjylyq resýrstardyń kólemin, daǵdarysqa qarsy sharalardyń aýqymyn eskere otyryp, bólinetin qarjynyń maqsatty ári tıimdi jumsalýy aıryqsha mańyzǵa ıe bolatynyn qadap aıtty.
«Bul mindet Esep komıtetine júkteledi. Bul jumysqa óńirlik revızııalyq komıssııalardy, qoǵamdyq keńesterdi jumyldyrý kerek. Sonymen birge, tótenshe jaǵdaıdyń erekshe talaptaryn eskergen jón», - dedi Memleket basshysy.
Budan buryn habarlanǵandaı, Memleket basshysy 42 500 teńge kólemindegi kómekti alatyn azamattar sanatynyń keńeıtiletinin aıtty.
