Prezıdent: TJM basshylary óz mindetterine selqos qaraıdy, ne isteý keregin bilmeıdi

SEMEI. QazAqparat - Qasym-Jomart Toqaev Abaı oblysyndaǵy órt aımaǵynda ótken jedel shtab otyrysynda mınıstrlerdi synǵa aldy, dep habarlaıdy QazAqparat.

«Bul – eń aldymen, osyndaı apattarǵa jol bermeý qajet, sonymen qatar tótenshe jaǵdaı bolǵan kezde tıisti sharalar joǵary deńgeıde uıymdastyrylýy kerek degen sóz. Bizdiń jaǵdaıymyzda kásibı salǵyrttyq, adamdardyń taǵdyryna múlde nemquraıly qaraý baıqaldy. Qazir buǵan taǵy da kóz jetkizdim. Al, qazirgi tańda sapaly, durys jumys atqarylyp jatqan joq. Muny moıyndaýymyz kerek. Bir sózben aıtqanda, bul salanyń jumysyn túbegeıli jaqsartý qajet. Mınıstrlik, onyń basshylary óz qyzmettik mindetterine selqos qaraıdy. Ne isteý kerek ekenin bilmeıdi. Shuǵyl sheshimder qabyldamaıdy. Sondyqtan osyndaı apattar oryn alyp otyr», - dep atap ótti Memleket basshysy.

Prezıdent keshegi kadrlyq aýys-túıis jaıynda da sóz qozǵady.

«Ózderińiz bilesizder, men keshe Tótenshe jaǵdaılar mınıstrin aýystyrý týraly sheshim qabyldadym. Jańa mınıstrdi taǵaıyndadym. General-maıor Syrym Dúısenǵazyuly Sháriphanov jumysqa kiristi. Tótenshe jaǵdaı salasynda tájirıbesi, tıisti bilimi bar», - dedi ol.