Prezıdent Túrkistan oblysynyń ákimi Darhan Satybaldyny qabyldady

ASTANA. KAZINFORM — Memleket basshysyna Túrkistan oblysynyń byltyrǵy áleýmettik-ekonomıkalyq damýy týraly esep berildi. 

Ótken jyldyń qorytyndysy boıynsha aımaqtyń negizgi makroekonomıkalyq kórsetkishterinde oń dınamıka baıqalady.

Atap aıtqanda, óńirdegi ónerkásip óniminiń kólemi 2,5% ósip, 1 trln teńgeden asqan. Óńdeý ónerkásibin damytý úshin jalpy somasy 30,2 mlrd teńge bolatyn 20 joba iske qosylyp, 594 jańa jumys orny ashylǵan;

Aldaǵy 5 jylda óńirdiń óz kirisin 100 mlrd teńgege arttyrý josparlanyp otyr.

Aldyn ala esep boıynsha byltyr jalpy óńirlik ónim kólemi 3,8 trln teńge bolǵan.

Al aýyl sharýashylyǵyndaǵy ónim kólemi 1,1 trln teńgeni quraǵan. Bul kórsetkish boıynsha Túrkistan oblysy respýblıkada kósh bastap tur.

Salany ártaraptandyrý nátıjesinde 3,3 mln tonna kókónis, baqsha ónimderi jınaldy. Bul — rekordtyq kórsetkish.

Aýyl sharýashylyǵynda ónim kólemin arttyrýǵa, sýdy únemdeýge yqpal etetin jańa ádis-tásilder men tehnologııalar engizilip jatyr.

Oblystaǵy kásipkerlik sýbektileriniń sany 211 myńǵa jetip, 1,6 trln teńgeniń ónimi óndirilgen.

Oblysta jalpy somasy 407,5 mlrd teńge bolatyn qurylys jumystary júrgizilip, 898,9 myń sharshy metr turǵyn úı paıdalanýǵa berilgen.

Úsh myńǵa jýyq otbasy baspanaly boldy.

Byltyr bıýdjet esebinen 35 mekteptiń qurylysy júrgizilip, 20 mektep ashyldy.

«Jaıly mektep» jobasy aıasynda oblysta úsh jyl ishinde 49 myń oqýshyǵa arnalǵan 63 mektep salynady.

Ótken jyly oblystaǵy 20 eldi mekenge jańadan aýyzsý qubyry tartyldy. Toǵyz aýyldaǵy eskirgen sý tartý júıeleri jańartyldy.

62 gazben qamtý nysanynyń qurylysy aıaqtalyp, 48 eldi mekenge kógildir otyn jetkizildi.

Kezdesý sońynda Qasym-Jomart Toqaev oblys ákimine halyqtyń ál-aýqatyn arttyrý, óńirdiń ekonomıkalyq jaǵdaıyn jaqsartý jóninde bergen tapsyrmalaryn júıeli ári sapaly oryndaý qajet ekenin aıtty.

Sondaı-aq Túrkistan óńirin damytý jumystaryn jalǵastyrýdy tapsyrdy.