Prezıdent Túrikmenstanmen ınvestıtsııalardy qorǵaý jónindegi kelisimdi ratıfıkatsııalaý týraly zańǵa qol qoıdy
ASTANA. KAZINFORM - Memleket basshysy «Qazaqstan Respýblıkasynyń Úkimeti men Túrikmenstan Úkimeti arasyndaǵy ınvestıtsııalardy ózara kótermeleý jáne qorǵaý týraly kelisimdi ratıfıkatsııalaý týraly» Qazaqstan Respýblıkasynyń Zańyna qol qoıdy. Bul týraly Aqordanyń baspasóz qyzmeti habarlady.
Zańnyń mátini baspasózde jarııalanady.
Buǵan deıin Senat Qazaqstan men Túrikmenstannyń strategııalyq áriptestigin nyǵaıtatyn kelisimdi ratıfıkatsııalaǵanyn jazǵan bolatynbyz.
- Búgin biz mańyzdy qujatty – Qazaqstan Respýblıkasy men Túrikmenstan Úkimetteri arasyndaǵy ınvestıtsııalardy ózara kótermeleý jáne qorǵaý týraly kelisimdi ratıfıkatsııalaý jónindegi Qazaqstan Respýblıkasy Zańyn qarastyryp otyrmyz. Bul halyqaralyq yntymaqtastyq salasyndaǵy kezekti ǵana kelisim emes. Bul – Qazaqstan men Túrikmenstan sekildi baýyrlas memleketterdiń strategııalyq áriptestigin nyǵaıtý jolyndaǵy mańyzdy qadam. Atalǵan zańnyń qabyldanýy – ınvestorlar úshin ashyq, turaqty jáne boljamdy jaǵdaılardy qalyptastyrýǵa, uzaqmerzimdi ekonomıkalyq yntymaqtastyqty keńeıtýge baǵyttalǵan. Sonymen qatar bul qujat tereńirek maǵynaǵa ıe – ol halyqtarymyz arasyndaǵy senim men ózara túsinistiktiń berik negizin qalaýǵa qyzmet etedi, - dedi kelisim boıynsha negizgi baıandama jasaǵan senator Amangeldi Nuǵmanov.
Senatordyń atap ótýinshe, bul zań ekonomıkanyń barlyq salasyndaǵy ınvestıtsııalyq úderisterge – memlekettik te, jeke sektordaǵy da ınvestıtsııalarǵa qoldaý kórsetýdi jáne olardy qorǵaýdy qamtamasyz etetin negizgi quqyqtyq akt. Bul – qos memlekettiń bıznes qaýymdastyqtarynyń múddelerin qorǵaý boıynsha memleketaralyq deńgeıde alǵash ret naqty kepildikter men mindettemelerdi bekitken biregeı jáne mańyzdy qujat. Sondaı-aq, kelisim halyqaralyq arbıtrajǵa qol jetkizý jáne sheteldik ınvestıtsııalarǵa ádil qaraý sııaqty mańyzdy máselelerdi bekitedi.
- Qazaqstan men Túrikmenstan jaı ǵana kórshi elder emes. Bizdi ortaq tarıhı tamyrlar, birtutas mádenı jáne rýhanı negiz baılanystyrady. Túrikmen halqy óziniń baı mádenıetimen, ulttyq bolmysty saqtaýdaǵy tabandylyǵymen, úlkenderge qurmetpen qaraýymen, dástúrlerdi qasterleýimen jáne jas urpaqty ulttyq qundylyqtar rýhynda tárbıeleýimen zańdy túrde maqtana alady. Túrikmenstan – ulttyq kıimdi kııý dástúri memlekettik deńgeıde saqtalyp, qoldaý tabatyn sırek elderdiń biri. Munda ata-baba murasymen tiri baılanys tek saqtalyp qana qoımaı, mádenı egemendiktiń úlgisi retinde qyzmet etip jatyr. Osyndaı memleketpen yntymaqtastyqty keńeıtý jáne tereńdetý – bul bizdiń sanaly tańdaýymyz. Bul tek ekonomıkalyq paıda ákeletin áriptestik qana emes, bul – rýhanı jaqyndasý, ózara qurmet pen urpaqtan-urpaqqa berilgen mádenı baılyqty birge saqtaý joly, - dedi Amangeldi Nuǵmanov.
Onyń atap ótýinshe, kelisimde basym baǵyttardyń biri retinde energetıka salasyndaǵy yntymaqtastyq kórsetilgen. Qazaqstan tarapy Túrikmenstandaǵy gazkondensat ken oryndaryn ıgerý jáne qubyr ınfraqurylymyn keńeıtý jobalaryna belsendi qatysýǵa daıyn ekenin bildirdi.