Prezıdent Túrikmenstan Halk Maslahatynyń tóraǵasyn týǵan kúnimen quttyqtady
ASTANA. KAZINFORM — Memleket basshysy Túrikmenstan Halk Maslahatynyń tóraǵasy Gýrbangýly Berdimuhamedovpen telefon arqyly sóılesti. Bul týraly Aqordanyń baspasóz qyzmeti habarlady.
Prezıdent túrikmen halqynyń Ulttyq kóshbasshysyn týǵan kúnimen quttyqtap, onyń baýyrlas Túrikmenstannyń ıgiligi úshin atqaryp jatqan jaýapty memlekettik qyzmetine tabys tiledi.
Qasym-Jomart Toqaev Arkadag Gýrbangýly Berdimuhamedovtiń Qazaqstan men Túrikmenstan arasyndaǵy ǵasyrlardan tamyr tartatyn dostyqqa, tatý kórshilikke jáne ózara qurmetke negizdelgen strategııalyq seriktestikti nyǵaıtýǵa eleýli úles qosqanyn atap ótti.
Áńgimelesý barysynda taraptar qazaq-túrikmen qarym-qatynasynyń joǵary deńgeıine nazar aýdaryp, ekijaqty kún tártibindegi ózekti máseleler men ózara yqpaldastyq perspektıvasyn talqylady.
