Prezıdent Túrikmenstannyń astanasy Ashhabad qalasyna bardy
AShHABAD. KAZINFORM — Halyqaralyq beıbitshilik jáne senim jylyna arnalǵan forýmǵa qatysý úshin Ashhabad qalasyna kelgen Memleket basshysy Qasym-Jomart Toqaevty Túrikmenstan Halk Maslahatynyń Tóraǵasy Gýrbangýly Berdimuhamedov qarsy aldy. Bul týraly Aqorda málim etti.
Áýejaıda Qasym-Jomart Toqaev pen Gýrbangýly Berdimuhamedov kelissóz júrgizdi.
Qasym-Jomart TOQAEV:
— Túrikmenstan basshylyǵynyń osy mańyzdy is-sharaǵa shaqyrýyn erekshe yqylaspen qabyl aldym. Erteń talqyǵa túsetin máseleler qazirgideı almaǵaıyp, bulyńǵyr jaǵdaıda ári Birikken Ulttar Uıymynyń 80 jyldyǵy aıasynda óte ózekti dep oılaımyn. Atalǵan forým tabysty ótetinine senimdimin. Bul basqosý Túrikmenstannyń jahandyq aýqymdaǵy ahýaldy turaqtandyrýǵa, sondaı-aq Ortalyq Azııadaǵy dostyq pen yntymaqtastyqqa negizdelgen qarym-qatynasty nyǵaıtýǵa qosqan taǵy bir eleýli úlesi bolmaq, — dedi Qazaqstan Prezıdenti.
Memleket basshysy Túrikmenstan Prezıdenti Serdar Berdimuhamedovtiń jaqynda Qazaqstanǵa jasaǵan memlekettik saparyna oń baǵa berip, joǵary deńgeıde qol jetkizilgen ýaǵdalastyqtardy júzege asyrýdyń mańyzdy ekenin atap ótti. Gýrbangýly Berdimuhamedov Túrikmenstannyń turaqty beıtaraptyǵynyń 30 jyldyǵyna oraılastyrylǵan forýmǵa qatysýǵa kelgeni úshin Qazaqstan Prezıdentine rızashylyǵyn bildirip, ekijaqty kún tártibiniń negizgi máselelerine toqtaldy.
— Ózara qarym-qatynas týraly sóz qozǵaǵanda, Túrikmenstan Prezıdentiniń jaqynda Qazaqstanǵa jasaǵan memlekettik saparyn aıtpaı ketýge bolmaıdy. Sapar joǵary deńgeıde ótti. Ekonomıka jáne mádenı-gýmanıtarlyq salalardaǵy yntymaqtastyq perspektıvasy talqylandy. Eki el yqpaldastyǵyn damytýǵa eleýli úles qosqanyńyz úshin Sizge alǵys aıtamyn. Sondaı-aq barsha baýyrlas qazaq halqyna izgi tilegimdi joldaımyn, — dedi Túrikmenstan Halk Maslahatynyń Tóraǵasy.
Aıta keteıik, buǵan deıin Qasym-Jomart Toqaev pen Masýd Pezeshkıan Qazaqstan-Iran bıznes forýmyna qatysty.