Prezıdent Túrkııa Prezıdentimen kelissóz kezinde energetıka keshenine qatysty máselelerge erekshe toqtaldy
ASTANA. KAZINFORM — Memleket basshysy Túrkııa Prezıdentimen kelissóz kezinde energetıka keshenine qatysty máselelerge erekshe toqtalǵanyn jetkizdi. Bul týraly Aqorda málim etti.
– Munaı-gaz naryǵyndaǵy jaǵdaıdy eskere otyryp, osy baǵyttaǵy yqpaldastyqty jandandyrýǵa ýaǵdalastyq. Turkish Petroleum Corporation kompanııasy Qazaqstan naryǵynda jumys isteýge nıet bildirip otyr. Biz muny quptaımyz. Elimiz iri jobalardy birlese júzege asyrýǵa múddeli. Sonymen qatar biz taý-ken salasyndaǵy yntymaqtastyqqa erekshe mán berip otyrmyz. Túrik kompanııalarynyń ken oryndaryn ıgerý, metaldy qaıta óńdeý jáne quıma óndirisi salasyndaǵy tájirıbesi mol. Osyǵan oraı, baýyrlas eldiń kásipkerlerin elimizdegi iri jobalarǵa belsene atsalysýǵa shaqyrdym. Taǵy bir mańyzdy sala – aýyl sharýashylyǵy. Bul baǵytta birqatar ınvestıtsııalyq joba iske asyrylyp jatyr. Sonyń ishinde Tiryaki Agro jáne Alarko Holding kompanııalarynyń jumysyn atap ótkim keledi. Sonymen qatar biz Túrkııa Prezıdentimen jaqyn arada aýyl sharýashylyǵy ónimderiniń saýdasyn ulǵaıtýǵa arnalǵan Jol kartasyn qabyldaýǵa kelistik. Bul qadam dándi-daqyl eksportyn arttyrýǵa yqpal etedi. Túrkııanyń zamanaýı agrotehnologııany keńinen qoldanyp jatqany belgili. Biz osy baǵyttaǵy yntymaqtastyqty nyǵaıtýǵa qyzyǵýshylyq tanytyp otyrmyz, – dedi Qasym-Jomart Toqaev.
Prezıdenttiń aıtýynsha, aqparattyq tehnologııalardy damytý, ekonomıkanyń túrli salasynda ozyq tsıfrlyq tásilderdi qoldaný – zaman talaby.
– Jýyrda men Jasandy ıntellektini orta bilim berý júıesine engizý týraly Jarlyqqa qol qoıdym. Muny elimizdiń bolashaǵy úshin jasalǵan óte mańyzdy qadam deýge bolady. Naqtyraq aıtqanda, biz bilim berý júıesin árbir oqýshynyń qarym-qabiletine saı beıimdeý, olardyń derbes derekterin qorǵaý, tsıfrlyq ınfraqurylymdy damytý jáne ozyq tehnologııany meńgergen pedagogterdi daıarlaý máselesine basa mán berip otyrmyz. Qazaqstan jasandy ıntellekt pen tsıfrlandyrý salasyn damytýdy strategııalyq basymdyq retinde qarastyrady. Bul baǵytta eki el kásipkerleri birqatar tabysty jobalardy júzege asyrdy. Ásirese, qazaq-túrik tsıfrlyq platformalaryn atap ótken jón. Kaspikz kompanııasy Túrkııanyń Hepsiburada kompanııasynyń jumysyn jandandyrady. Al Freedom Holding Túrkııa naryǵynda tsıfrlyq ekojúıe men brokerlik qyzmetti qalyptastyrady. Sondaı-aq «Borsa Ystanbul» túrik bırjasy men Astana halyqaralyq qarjy ortalyǵy memorandýmǵa qol qoıdy. Munyń bári eki eldiń tsıfrlyq saýda salasyndaǵy yqpaldastyǵyn odan ári kúsheıteri sózsiz, – dedi Memleket basshysy.
