Prezıdent: Túrkııa — Qazaqstannyń eń iri bes saýda seriktesiniń biri
ANKARA. KAZINFORM — Qazaqstan men Túrkııa prezıdentteri keńeıtilgen quramda kelissóz júrgizdi, dep habarlaıdy Aqordanyń baspasóz qyzmeti.
Prezıdentterdiń kelissózi eki eldiń resmı delegatsııa músheleriniń qatysýymen odan ári jalǵasty.
Qasym-Jomart Toqaev baýyrlas eldiń Respýblıka kúni qarsańyndaǵy júzdesý tereń sımvoldyq mánge ıe ekenine nazar aýdaryp, Túrkııa Prezıdenti men barsha túrik halqyn ulyq merekemen quttyqtady.
— Sizdiń parasatty basshylyǵyńyzdyń ári kóregen saıasatyńyzdyń arqasynda Túrkııa aýqymdy reformalardy tabysty júzege asyryp jatyr. Elińiz saıası jáne ekonomıkalyq turǵydan jańǵyryp, qarqyndy damyp keledi. Túrkııanyń abyroı-bedeli jyldan jylǵa arta túsýde. Biz Ózińizdi álemdegi asa yqpaldy kóshbasshylardyń biri retinde bilemiz. Sizdiń ashyq ári batyl ustanymyńyz, beıbitshilik pen ádildik jolyndaǵy kúsh-jigerińiz jahandyq deńgeıde moıyndalyp otyr. Túrik halqynyń mártebesi aldaǵy ýaqytta da asqaqtaı beredi dep senemin. Qazaq eli Túrkııany árqashan qoldaıdy jáne aǵaıyn jurttyń árbir jetistigine shyn júrekten qýanady, — dedi Qasym-Jomart Toqaev.
Qazaqstan Prezıdenti ózara baılanystardy odan ári nyǵaıtýǵa erekshe mán beretinin atap ótti.
— Qazaq-túrik yqpaldastyǵy tereńnen tamyr tartady. Tarıhymyz — ortaq, tilimiz ben dilimiz — bir, dástúrimiz — uqsas. Eki eldiń saıası yntymaqtastyǵy ózara senimge jáne myzǵymas dostyqqa negizdelgen. Memleketterimizdiń arasynda sheshimin tappaǵan eshqandaı másele joq. Biz ekijaqty jáne halyqaralyq deńgeıde bir-birimizge únemi qoldaý kórsetip júrmiz. Saýda-ekonomıka salasyndaǵy qarym-qatynasymyz da kúsheıip keledi. Túrkııa — Qazaqstannyń eń iri bes saýda seriktesiniń biri. Buǵan qosa, Anadolydaǵy aǵaıyn ulttyq ekonomıkamyzǵa kólemdi qarjy salǵan basty 10 ınvestordyń qataryna kiredi. Qazaqstanda birqatar túrik kompanııalary tabysty jumys istep jatyr. Biz túrik baýyrlarymyzǵa jan-jaqty qoldaý kórsetip, olardyń kásip júrgizýi úshin qolaıly jaǵdaı jasaýǵa tyrysamyz, — dedi Memleket basshysy.
Qasym-Jomart Toqaevtyń aıtýynsha, Rejep Taııp Erdoǵannyń bıyl mamyr aıynda Qazaqstanǵa memlekettik sapary jemisti bolyp, birqatar mańyzdy ýaǵdalastyqqa qol jetkizildi.
Sapar aıasynda eki el arasyndaǵy Strategııalyq yntymaqtastyq keńesiniń altynshy otyrysy uıymdastyryldy. Saýda-ekonomıkalyq, ınvestıtsııalyq jáne mádenı-gýmanıtarlyq salalarda aýqymdy jobalar tabysty júzege asyrylýda.
Eń bastysy, qarym-qatynas máńgilik dostyq jáne keńeıtilgen strategııalyq seriktestik deńgeıine kóterildi.
— Seriktestigimizdi odan ári damytý bárimizdiń múddemizge saı keledi. Erteń Ózińizben birge Túrki memleketteri uıymynyń 13-sammıtine qatysamyz. Jaqyn arada Antalııada SOR31 klımattyq forýmy ótedi. Men osy bedeldi basqosýǵa qatysýdy josparlap otyrmyn. Munyń bári ekijaqty jáne kópjaqty baılanysymyzdy damytýǵa tyń serpin beretini sózsiz, — dedi Qazaqstan Prezıdenti.
