Prezıdent Túrkııa elimizdiń iri ınvestorlarynyń qataryna kiretinin atap ótti
ASTANA. KAZINFORM – Prezıdent Túrkııanyń Qazaqstan ekonomıkasyna ınvestıtsııasyn atap ótti. Bul týraly Aqordanyń baspasóz qyzmeti habarlady.
– Búginge deıin túrik kásipkerleri ekonomıkamyzǵa 6 mıllıard dollar kóleminde qarajat saldy. Qazaqstannyń da baýyrlas memleketke salǵan ınvestıtsııasy ósip, shamamen 2,5 mıllıard dollarǵa jetti. Qazir elimizde 4 myńǵa jýyq túrik kompanııasy jumys isteıdi. Bul – bizdiń uzaq merzimge arnalǵan seriktestigimizdiń kepili. Sondaı-aq Túrkııa – elimizdiń eń iri bes saýda seriktesiniń biri. Eki el arasyndaǵy alys-beris 8,8 paıyzǵa ósip, 5 mıllıard dollardan asty. Árıne, ekonomıkamyzdyń áleýetin eskeretin bolsaq, bul kórsetkishti arttyrýǵa tolyq múmkindik bar. Búgin biz qatysqaly otyrǵan Qazaqstan-Túrkııa bıznes forýmy eki eldiń saýda-ekonomıkalyq yqpaldastyǵyna tyń serpin beredi dep senemiz. Biz ashyq ári senimdi seriktes retinde túrik ınvestorlaryn qoldaýǵa árqashan daıynbyz. Sondyqtan túrik kompanııalaryn uzaq merzimge arnalǵan iri strategııalyq jobalarǵa atsalysýǵa shaqyramyz, – dedi Memleket basshysy.
Qasym-Jomart Toqaev jańa Konstıtýtsııaǵa sáıkes Qazaqstanda barlyq menshik túrine kepildik beriletinin málimdedi.
– Sonyń ishinde sheteldik menshik pen ınvestorlardyń quqyǵy jan-jaqty qorǵalady. Buǵan qosa, túrik baýyrlarymyzǵa Qazaqstannyń Altyn Visa baǵdarlamasyn qoldanýǵa bolady. Bul vızany alǵan kásipkerler men mamandarǵa salyq jáne kóshi-qon máselesine qatysty jeńildikter beriledi. Qazirgi geosaıası jaǵdaıda kólik-logıstıka salasynyń strategııalyq mańyzy arta túskeni anyq. Búgingi tańda eki el arasyndaǵy júk tasymaly turaqty damyp jatyr. Byltyr temirjol arqyly júk tasymaly 35 paıyzǵa, avtokólik arqyly júk tasymaly 5 paıyzǵa ulǵaıdy. Bizdiń elderimizdi Shyǵys pen Batysty jalǵaıtyn kópir deýge bolady. Osy ortaq ıgiligimizdi barynsha tıimdi paıdalaný qajet. Sondyqtan qadirli Rejep Taııp Erdoǵan myrzamen naqty jobalar arqyly «Orta dálizdiń» áleýetin arttyrýǵa ýaǵdalastyq. Bul qos halyqtyń múddesine tolyq saı keledi. Osy rette, áýe tasymaly men «cargo» salasynyń mańyzy erekshe ekenin aıta ketý kerek. TAV Airports Holding kompanııasy Almaty halyqaralyq áýejaıyn Ortalyq Azııadaǵy logıstıkalyq hab retinde damytýdy kózdep otyr. Biz bul jobaǵa jan-jaqty qoldaý kórsetýge daıynbyz. Sonymen qatar túrik ınvestorlaryn kólik-logıstıka salasyndaǵy basqa da jobalarǵa belsene atsalysýǵa shaqyramyz. Úkimetimiz Túrkııa kásipkerlerine arnaıy jeńildikter usynýǵa ázir, – dedi Prezıdent.
