Prezıdent Túrki órkenıetiniń murasyn saqtaý jónindegi qujatty usyndy
ASTANA. KAZINFORM – Túrki elderiniń rýhanı jáne mádenı qundylyqtary nazardan tys qaldyrmaýy qajet. Bul týraly búgin Túrki memleketteri uıymynyń beıresmı sammıtinde Prezıdent Qasym-Jomart Toqaev málim etti.
– Jasandy ıntellekt pen ozyq tehnologııa dáýirinde rýhanı jáne mádenı qundylyqtardy nazardan tys qaldyrmaý qajet. Túrki órkenıetiniń mol murasyn saqtaý jáne ony zerdeleý - tarıhı jadyny jańǵyrtý máselesi ǵana emes. Bul – bizdiń birigeı bolmysymyzdy, birligimizdi jáne yntymaqtastyǵymyzdy kórsetetin mańyzdy faktor. Osy oraıda men Túrki órkenıetiniń murasyn saqtaý jónindegi konventsııa jobasyn pysyqtaý týraly usynysty qoldaýǵa shaqyramyn, - dedi Qasym-Jomart Toqaev.
Prezıdenttiń aıtýynsha, bul qujat túrki halyqtarynyń tarıhı, mádenı murasyn saqtaý jáne dáripteý isine quqyqtyq negiz bolady, sondaı-aq ıÝNESKO-nyń osy saladaǵy qyzmet aıasyn keńeıte túsýge yqpal etedi.
Budan buryn habarlanǵandaı, Búgin Túrkistan qalasynda Prezıdent Qasym-Jomart Toqaevtyń qatysýymen Túrki memleketteri uıymynyń beıresmı sammıti bastaldy. Sammıtke TMU-ǵa múshe memleketterdiń basshylary - Túrkııa prezıdenti Rejep Taııp Erdoǵan, Ózbekstan prezıdenti Shavkat Mırzıeev pen Qyrǵyzstan prezıdenti Sadyr Japarov, Ázerbaıjan prezıdenti Ilham Álıev keldi.
Jasandy ıntellekt jáne tsıfrlyq damý» taqyrybyna arnalǵan jıyn Qazaqstannyń tóraǵalyǵymen uıymdastyrylyp otyr.
Aıta keteıik, Memleket basshysy Túrki órkenıeti ortalyǵyn qurý týraly sheshim qabyldady.
