Prezıdent Túrki memleketteri uıymyna múshe elderdiń Joǵarǵy sot tóraǵalarymen kezdesti
ASTANA. KAZINFORM – Qasym-Jomart Toqaev Túrki memleketteri uıymyna múshe elderdiń joǵarǵy sottarynyń ekinshi konferentsııasyna qatysý úshin arnaıy kelgen Ázerbaıjan Respýblıkasynyń Joǵarǵy sot tóraǵasy Inam Kerımovty, Qyrǵyz Respýblıkasynyń Joǵarǵy sot tóraǵasy Mederbek Satyevty, Túrkııa Respýblıkasynyń Kassatsııalyq sot tóraǵasy Omer Kerkezdi, Túrkııa Respýblıkasynyń Memlekettik keńes tóraǵasy Zekı Iıgıtti, Ózbekstan Respýblıkasynyń Joǵarǵy sot tóraǵasynyń birinshi orynbasary Alısher Ýsmanovty qabyldady.
Prezıdent meımandarǵa iltıpat bildirip, baýyrlas elder yntymaqtastyǵyn nyǵaıtýda Túrki memleketteri uıymynyń róli aıryqsha ekenin aıtty
– Osy tusta uıymǵa múshe memleketterdiń sot jáne quqyq qorǵaý salasyndaǵy yqpaldastyǵy kúsheıip kele jatqanyn atap ótý qajet. Erteń Túrkistan tórinde ótetin alqaly jıyn sonyń aıqyn kórinisi bolmaq. Árbir órkenıetti eldiń ósip-órkendeýi úshin sot júıesiniń mańyzy zor. Sondyqtan joǵarǵy sottar arasyndaǵy ózara tyǵyz baılanysty tereńdetý baýyrlas elderimizdiń ortaq múddesine tolyq saı keledi, – dedi Qasym-Jomart Toqaev.
Memleket basshysy qazir kóptegen elder jahandyq tehnologııalyq ózgerister kóshinen qalyp qoımaý úshin zaman talabyna qaraı qarqyndy damý jolyna túsip jatqanyna nazar aýdardy.
– Osy baǵytta biz de kúsh-jiger biriktirip, jumyla áreket etýimiz kerek. Erteń Túrkistanda ótetin konferentsııada sot salasyn tsıfrlandyrý máselesi jan-jaqty talqyǵa túsedi. Sondaı-aq ınvestorlardyń quqyqtaryn qorǵaý jáne basqa da mańyzdy máseleler qaralady. Mundaı kún tártibi óte oryndy jáne ózekti dep aıtýǵa bolady. Osy máseleler boıynsha pikir almasý bizdiń uıymnyń odan ári damýyna jáne onyń bedeliniń kúsheıýine úlken serpin bereri sózsiz. Barshańyzǵa belgili, Qazaqstan Túrki memleketteri uıymy aıasyndaǵy barlyq ıgi bastamalardy qoldaıdy, aldaǵy ýaqytta da solaı bolmaq, – dedi Memleket basshysy.
