Prezıdent turǵyn úıdi sapasyz salǵandardy jaýapkershilikke tartýdy tapsyrdy
ALMATY. QazAqparat - Paıdalanýǵa berilgen turǵyn úı sapasyna erekshe nazar aýdarý qajet. Qazaqstan Prezıdenti Qasym-Jomart Toqaev Almatydaǵy keńes barysynda jańa salynǵan turǵyn úıler týraly aıtty, dep habarlaıdy QazAqparat tilshisi.
«2011 jyldan bastap 2018 jylǵa deıin memleket jalpy aýdany 416 myń sharshy metrdi quraıtyn jalpy 6 841 páteri bar 182 turǵyn úı paıdalanýǵa berildi. Bul az. Sebebi turǵyn úı kezeginede 25 myń adam tur. Qala bıligi turǵyn úı qurylysynyń qarqynyn edáýir arttyrýy kerek. Sonymen birge, paıdalanýǵa beriletin baspana sapasyna erekshe nazar aýdarý qajet. Kóptegen nysandarda júıeli problemalar kezdesedi. Atap aıtar bolsaq, jertóleni sý basý, qabyrǵanyń jarylýy, ınjenerlik kommýnıkatsııadaǵy aqaý jáne t. b. Baqylaýshy organdar turǵyn úılerdi egjeı-tekjeıli tekserip baryp qabyldaýy kerek. Qazirgi jaǵdaı syn kótermeıdi. Eger úı sapasyz salynsa onda oǵan qatysy bar adamdar jýapkershilikke tartylýy kerek. Bul meniń quqyq qorǵaý organdaryna bergen tikeleı tapsyrmam», - dedi Qasym-Jomart Toqaev.
Sonymen qatar, Memleket basshysy Almatydaǵy eski úıler týraly da pikir bildirdi.
«Almatyda ótken ǵasyrdyń ortasynda salynǵan 1 myńnan astam eski úı bar. Ákimdik qalalyq jáne respýblıkalyq bıýdjettiń múmkindikterin eskere otyryp, tozyǵy jetken úılerdi qaıta qalpyna keltirý jumystary boıynsha maqsatty baǵdarlama qabyldaýy qajet», - dedi Prezıdent.
