Prezıdent turǵyn úı-kommýnaldyq sharýashylyq salasyndaǵy máselelerdi sheshýdi tapsyrdy

ASTANA. QazAqparat - Búgin QR Parlamenti palatalarynyń birlesken otyrysynda Elbasy Nursultan Nazarbaev Úkimetke turǵyn úı-kommýnaldyq sharýashylyq salasynda sheshilmegen máselelerge nazar aýdarýdy tapsyrdy, dep habarlaıdy QazAqparat.

«Qurylystyń qarqyndy damýy turǵysynda turǵyn úı qatynastary salasy árbir turǵynnyń múddesin kóteredi. Turǵyn úı-kommýnaldyq sharýashylyq salasynda sheshilmegen máseleler barshylyq. Júrgizilgen saýalnamalar nátıjesinde bul másele kóp azamattardy alańdatyp otyrǵany baıqaldy», - dedi Memleket basshysy. 

Osy oraıda Prezıdent saladaǵy qyzmet kórsetýshiler jumysy jáne basqa da baǵyttardaǵy qyzmetter tıisti deńgeıde jetildirilmegenin atap ótti. 

Elbasy qyzmet kórsetýshi kompanııalarǵa baspana ıeleriniń arasyndaǵy ózara is-qımyldyń ashyqtyǵyn qamtamasyz etý qajettigin tapsyrdy.

Sonymen qatar, osy baǵyttaǵy qarjynyń jumsalýyn qadaǵalaýdy, tabıǵı monopolııa salasyndaǵy jaýapkershilik máselesin aıryqsha nazarda ustaýdy júktedi. 

«Jalpy úıge ortaq sharýashylyqty basqarýdyń túsinikti ári tıimdi júıesin qurý kerek. Meniń tapsyrmam boıynsha Úkimet tıisti zań jobasyn ázirledi jáne ol Parlament qaraýyna bıyl usynylady», - dedi N. Nazarbaev.