Prezıdent kóppáterli turǵyn úılerdi basqarý júıesin jetildirýge baǵyttalǵan qujatqa qol qoıdy
ASTANA. KAZINFORM - Memleket basshysy «Qazaqstan Respýblıkasynyń keıbir zańnamalyq aktilerine turǵyn úı-kommýnaldyq sharýashylyq, kásipkerlik jáne eksporttyq-kredıttik agenttiktiń qyzmeti máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Bul týraly Aqordanyń baspasóz qyzmeti habarlady.
Zań Jer, Kásipkerlik, Azamattyq protsestik, Áleýmettik jáne Sý kodeksterine, sondaı-aq 23 zańǵa túzetýler engizdi.
Túzetýlerdiń birinshi blogy kóppáterli turǵyn úılerdi basqarý júıesin jetildirýge baǵyttalǵan.
Zań kóppáterli turǵyn úılerdi basqarýdyń jaı seriktestik nysanyn joıyp, basqarýdyń eki túrin ǵana saqtady: MIB (menshik ıeleri birlestigi) jáne TBB (tikeleı birlesip basqarý).
Túzetýlerdiń ekinshi blogy salyq zańnamasyna engizilgen ózgeristerge baılanysty.
Zań, sonymen qatar, deklaratsııalaý máselelerinde quqyqtyq aıqyndyqty arttyrýǵa jáne Salyq kodeksiniń erejelerine silteme normalardy ózektendirýge baǵyttalǵan basqa da túzetýlerdi qamtydy.
Zańnyń mátini baspasózde jarııalanady.
Osyǵan deıin Asqar Іzbasov áskerı-áýe kúshteriniń qolbasshysy laýazymyna taǵaıyndalǵany týraly jazdyq.