Prezıdent: Tuǵyryna qonǵan jańa Konstıtýtsııada halqymyzdyń biregeı bolmysy kórinis tapty
ASTANA. KAZINFORM — Memleket basshysy Alem.ai battle jáne AI Governance Cup baıqaýlarynyń jeńimpazdaryn marapattaý rásiminde sóz sóıledi. Bul týraly Aqordanyń baspasóz qyzmeti málim etti.
Prezıdent elimizde qoǵamnyń barlyq salasyn qamtyǵan aýqymdy reformalar júzege asyrylyp jatqanyna toqtaldy.
— Naýryz aıynda Qazaqstannyń jańa Konstıtýtsııasy qabyldandy. Bul, eń aldymen, elimizdiń keleshegi úshin óte mańyzdy jáne tarıhı qadam boldy. Azamattarymyz, ásirese, jastarymyz muny jaqsy túsinedi. Olar respýblıkalyq referendýmǵa belsene qatysyp, Ata zańdy qoldap, daýys berdi. Jurtymyz bir qoǵam bolyp jaýapkershilik pen otanshyldyq rýhynyń ozyq úlgisin kórsetti. Tuǵyryna qonǵan jańa Konstıtýtsııada halqymyzdyń biregeı bolmysy, basty qundylyqtary men bıik maqsattary kórinis tapty. Búgin osy jıynǵa el jastary, bilimdi, bilikti, zııatker azamattar qatysyp otyr. Men sizderdi Qazaqstannyń jarqyn bolashaǵy dep sanaımyn, — dedi Qasym-Jomart Toqaev.
Memleket basshysy ozyq oıly jastar elimizdi bıik belesterge bastap, ultymyzdyń mereıin ósiretinine senim bildirdi.
— Halyq Konstıtýtsııasy — óskeleń urpaqqa jol kórsetetin temirqazyq. Jańa Ata zańymyz — Ádiletti Qazaqstannyń myzǵymas tuǵyry. Zań men tártip qaǵıdaty memleketimizdiń ózegine, ult sanasynyń arqaýyna aınaldy. «Taza Qazaqstan» tujyrymdamasy halqymyzdyń týǵan jerge, tumsa tabıǵatqa degen qamqorlyǵyn kúsheıtti. Elimizde qoǵamdyq mańyzy bar jumysty mindet emes, qasterli paryz sanaıtyn naǵyz janashyr azamattar kóbeıdi. Biz olardy eriktiler nemese volonterler dep ataımyz. Mine, osy qundylyqtardyń bári de Halyq Konstıtýtsııasynyń preambýlasyna arnaıy jazyldy. Memlekettiń basty baılyǵy — adam. Sondyqtan adam kapıtalyn damytý konstıtýtsııalyq mindet retinde aıqyndaldy. Bas qujatta elimizdiń ǵylym men bilimge, ınnovatsııaǵa basymdyq beretini naqty kórsetildi, — dedi Prezıdent.
Buǵan deıin Memleket basshysyna otandyq CryptoPay júıesin paıdalaný arqyly Qazaqstandaǵy alǵashqy krıptovalıýtamen tóleý úrdisi kórsetildi.
