Prezıdent: Tsıfrlyq transformatsııa men JI - básekege qabilettiligimizdiń kepili
ASTANA. KAZINFORM — Prezıdent elordada Azııadaǵy ózara is-qımyl jáne senim sharalary keńesi (AÓSShK) shtab-páteriniń ashylý rásiminde sóz sóılep, elimizde energetıka, kólik jáne tsıfrlandyrý salalaryndaǵy ınfraqurylymdy jappaı damytý úshin qabyldanyp jatqan sharalarǵa toqtaldy. Bul týraly Aqorda málim etti.
— Qazaqstan halyqaralyq seriktestermen birge temirjol jáne avtokólik dálizderin, teńiz porttaryn, jalpy tranzıt jáne logıstıka salasyn jańǵyrtýdy belsendi túrde qolǵa aldy. Tsıfrlyq transformatsııa men jasandy ıntellekt — elimizdiń básekege qabilettiliginiń kepili. Biz Qazaqstandy tsıfrlyq memleketke aınaldyrǵymyz keledi. Óıtkeni jasandy ıntellekt ósimi ınnovatsııa men tsıfrlyq derbestiktiń negizgi qozǵaýshy kúshi bolady. Osy strategııalyq mańyzy zor salaǵa kúsh-jigerimizdi jumyldyrý úshin Jasandy ıntellektini damytý jónindegi keńes qurdyq. Kóp uzamaı qýatty sýperkompıýterdi iske qosamyz, — dedi Prezıdent.
Qasym-Jomart Toqaev aýyl sharýashylyǵyn jańǵyrtýdy taǵy bir strategııalyq baǵyt retinde atady. El ekonomıkasyn ártaraptandyrýǵa jáne azyq-túlik qaýipsizdigin qamtamasyz etýge atalǵan salanyń yqpaly zor.
— Biz jahandyq qosylǵan qun tizbegimen tolyq ıntegratsııalanǵan, sondaı-aq klımat pen ornyqty damý salasyndaǵy maqsattarǵa saı keletin turaqty ekonomıkanyń negizin qalap jatyrmyz. Bul uzaqmerzimdi maqsatqa jetý úshin halyqaralyq seriktestermen tyǵyz yntymaqtastyq qurýǵa múddelimiz. Oraıly sátti paıdalanyp, osy mańyzdy bastamany júzege asyrýǵa úles qosqan dıplomattar qaýymynyń aıryqsha rólin atap ótkim keledi, — dedi Memleket basshysy.
Sóz sońynda Qasym-Jomart Toqaev barsha AÓSShK qatysýshylaryna tabys tilep, Uıymǵa joǵary deńgeıde tóraǵalyq jasaǵany, dıalogty nyǵaıtýdaǵy ólsheýsiz kúsh-jigeri, AÓSShK-niń ınstıtýttyq damýyna qosqan úlesi úshin Qazaqstannyń senimdi dosy — Ázerbaıjan eline alǵys aıtty.
Aıta keteıik, Memleket basshysy Astanadaǵy AÓSShK shtab-páteriniń ashylý rásimine qatysty.
Prezıdent is-sharaǵa jınalǵan qaýym aldynda sóz sóılep, elimizdegi dıplomatııa salasynyń qyzmetkerleri men ardagerlerin kásibı merekelerimen quttyqtady.