Prezıdent tsıfrlyq keńistikte qazaqsha sapaly ári tartymdy ónimderdi kóbeıtýdi tapsyrdy
ASTANA. KAZINFORM — Tsıfrlyq keńistikte qazaq tilindegi sapaly ári tartymdy ónimderdi kóbeıtý — asa mańyzdy mindet. Bul týraly Memleket basshysy Qasym-Jomart Toqaev «Qazaq tili» qoǵamynyń H quryltaıynda aıtty.
Prezıdenttiń aıtýynsha, tildiń bolashaǵy tek sózdik pen oqýlyqqa baılanysty emes. Adam qaı tilde aqparat izdep, fılm kórip, bilim alsa, sol tildiń áleýeti kúsheıe túsetini anyq.
— Sondyqtan tsıfrlyq keńistikte qazaq tilindegi sapaly ári tartymdy ónimderdi kóbeıtý — asa mańyzdy mindet. Ásirese, qazaq tilin ózdiginen úırenýge múmkindik beretin ІT-ónimder, balalardyń tilin damytýǵa arnalǵan fılmder men oıyndar kóp bolýy qajet, — dedi Memleket basshysy.
Qazaqsha aqparattyń aıasy, ıaǵnı qazaq tilindegi kontenttiń aýqymy meılinshe keń bolǵany durys.
Ǵylym, tehnologııa, mádenıet, kásipkerlik, sport jáne basqa da ózekti taqyryptar boıynsha sapaly ónim ázirlegen jón.
— Jalpy, osyndaı jobalarǵa memleket tarapynan naqty qoldaý kórsetý qajet. Bul másele boıynsha arnaıy jumys tobyn qurýǵa bolady. Osy mańyzdy iske «Qazaq tili» qoǵamynyń basshysy Raýan Kenjehanuly jáne qoǵamnyń músheleri zor úles qosary kúmánsiz. Saıyp kelgende, tilimizdiń bolashaǵyna bárimiz birdeı jaýaptymyz. Árqaısymyz qazaq tiliniń tuǵyryn nyǵaıtýǵa atsalysýymyz kerek, — dedi Qasym-Jomart Toqaev.
Aıta keteıik, Memleket basshysy Qasym-Jomart Toqaev Halyqaralyq «Qazaq tili» qoǵamynyń H quryltaıynda sóz sóılep jatyr.
Shara barysynda Prezıdent qazaq tiliniń abyroı-bedelin arttyrý úshin tabandy jumys isteý kerektigin aıtty.
Jańa Konstıtýtsııada «Táýelsizdik» jáne «Egemendik» sózderin bas árippen jazylatyn boldy.
